尋日上市四隻新股除咗撞期之外，仲撞埋行頭。呢四隻新股唔係建築股就係機械股，所以送畀港交所（00388）嘅紀念品都同工程有關，今期撞晒橋添。
講開建築工程，相信大家都認同職業安全係最重要，豐盛機電（00331）一於就送個迷你版「職安真漢子」畀港交所，絲絲一睇到即刻想聞歌起舞。
低調上市嘅新福港（01447），份禮就一啲都唔低調，為港交所送上一頂安全帽。
其實話係頭盔都不為過，因為嗰頂安全帽重五公斤，就咁睇仲係成頂銀色添！聽講話唔知係純銀定鍍銀，不過重成五公斤，分分鐘仲重過個頭盔添。
而工業機械設備公司焯陞（01341）同中國能源建設（03996），就分別送咗水晶吊臂車同一幅畫，勉強叫做各有特色咁啦。
余絲韻
