絲絲講場：劉強東寸淘寶累街坊

直頭係啲企業話事人互相單打甚至嗌交，好似內地電商兩巨頭京東董事長劉強東同阿里巴巴主席馬雲，呢期劉強東趁受訪，公開鬧爆阿里淘寶累街坊。

市場唔信任中國品牌

劉強東話阿里淘寶係內地最大嘅假貨來源地，仲話網商之間惡性價格戰鼓勵假貨，咁就累死內地市場上啲優質品牌商品，結果搞到啲中國人唔信任中國品牌，走晒去日本爆買呀盛盛盛……。絲絲翻譯嘅話，「累街坊」三個字，講晒。

投訴阿里禁搞「雙十一」

馬雲早排先上完Forbes封面，個名仲拍住「四萬大盜」。今趟劉強東開火，一嚟就講「假貨」，都瞄得相當準。劉強東仲話，清除網上賣假貨非常非常容易（嗱，佢真係用咗兩個「非常」），請一個程式員用一日時間就搞掂，「你說80塊錢的Gucci還用想嗎？二手的都不可能。」

佢兩位互插，其實都唔係第一日，甚麼「京東注定係個悲劇」、「京東賺唔到錢」都聽唔少。上個月京東仲走去報官，話阿里唔畀商戶喺阿里以外搞「雙十一」促銷，擾亂市場秩序咁話。

劉強東呢期話內地互聯網行業仲係遵循叢林法則，話京東要將呢行帶去文明世界。絲絲好想知，喺文明世界，交係點嗌嘅呢？

余絲韻