港人去泰國玩，必買手信實有「小老板」（Tao Kae Noi）紫菜，「小老板」尋日剛喺曼谷上市，係佢哋生產商Taokaenoi Food ＆ Marketing PCL隻股票真係掛牌嗰隻上市，而佢哋老闆名副其實係小老闆，事關佢係80後，今年先得31歲！
呢位80後小老闆Itthipat Peeradechapan，以前係勁打機毒男一名，佢點由毒男鍊成今日嘅泰國零食大王？
Itthipat係泰國出世嘅華僑第二代，屋企本來係生意世家，佢嘅少爺日子過得無耐，就喺佢十幾歲時，九八年亞洲金融風暴殺到，家道中落兼負債纍纍。Itthipat急急想賺錢，高中就開始幫軟件開發商打機試Game嚟賺錢，佢仲試過賣DVD，但衰咗。
佢第一桶金係「做食」，賣糖炒栗子，20歲都未到就賺到一筆，仲用呢一桶金搞起佢嘅紫菜事業。有幾勁？只不過係○四年起，全泰國約3,000間七仔（7-11）都賣緊「小老板」紫菜咁啫；又兼且喺○七年幫屋企還清晒啲債咁啫。佢嘅經歷仲喺一一年被改編過拍戲《海苔億萬富翁》（The Billionaire）添。
「小老板」舊年佔咗全泰國紫菜產業62%市佔率，最大嘅海外市場就係中國，貢獻咗成22%，呢排仲進軍日本市場添。
佢公司今次招股上市，集資大概14億泰銖（約3.04億港元)，會用嚟起廠。股份尋日喺曼谷首掛，爆升過31%！
若然你都買過「小老板」紫菜做手信，咁毒男變零食大王呢場造化，你都算叫做有功德。