積金15年：八盡財星積金「供」略
強積金幾乎人人都要供！對於它，你會讚賞還是痛斥？強積金不知不覺供了十五周年，有熟悉市場的金融界人士對它不屑一顧，有人當它如股票來炒！結果焦頭爛額。十多年供款生涯飛快過去，打工仔都有一段段積金投資心聲！
金額少 當儲錢旅行
銀河證券業務發展董事羅尚沛（Eugene）投資經驗老到，但竟也懶理強積金，他說：「我好懶，無咩花時間揀強積金，通常幾年先調配一次，且都跟公司提供嘅強積金組合選購。賺幾多，蝕幾多，我都無咩理。我揀進取型，主要投資港股。」
Eugene對強積金回報未抱太大期望，「我未知會點使呢舊錢，我仲有排做，未咁快退休。若到時仲行得走得，可能會用嚟去旅行。舊錢都唔會多，可能買樓畀首期都唔夠。我心態係當啲錢輸左，若最後真係儲倒錢，就當Bonus。」
他認為揀選強積金非易事，「我做呢行算係對投資有啲認識，但都覺難揀，何況一般打工仔都唔識投資，叫佢哋點算？打工仔惟有做吓功課。」
氣氛變差轉泊貨幣
昆侖國際（香港）業務拓展部主管黃持正（Kenny）熟悉外匯市場，投資強積金當然會放眼全球經濟，較其他人更迅速做好部署。過去兩年，他的強積金組合一直以大中華地區及歐美為主，但鑑於最近內地經濟數據下滑，及美聯儲今月或加息，故大刀闊斧，把積金轉為低風險投資。他稱，「個人唔睇好一六年股債表現，已準備將組合轉為貨幣基金為主，諗住睇定啲，日後再做基金部署。」
Kenny冀將來強積金可儲來供樓。「強積金有好過冇，特別係畀無咩儲蓄概念嘅畢業生學習儲蓄，但佢收費貴，基金選擇少。我認為可學下新加坡，部分供款可用作還房貸，咁就可紓緩年輕人嘅置業壓力，增強積金認受性。」
生B增持Cash 避一劫
已為人母的散戶馮女士（Cecilia）認為，儲蓄投資當然會計及孩子將來，故個人投資由進取改為保守。她指：「○四年生咗囡囡後，我就即刻將基金轉為穩陣型，30%現金，其餘股債各半。未生BB前，我好搏，強積金以股票佔最多，當時回報有20至30%。」她囡囡出生及時，「好彩我嗰時執過個基金組合，如果唔係之後嘅大跌市，就真係渣都無得剩！」
她投資策略是每隔一、兩年，望一望強積金表現，「通常見到大跌市先郁手，小升小跌就由得佢。」
專注科研懶理積金
「星之子」陳易希（Stark）忙於事業發展，未有時間理會強積金，抱着「要供就供」的心態。「我開公司嗰陣，有個Agent同我講一定要供，咁就供咗。我無揀過邊間好，投資啲咩亦無時間掂。不過，我知我要搵日坐低認真睇睇。」
Stark一畢業便創業，與女友夏鈺渼創立科研初創企業Bull.B Tech，專攻手機應用程式研發。既然是老闆，他不但要選強積金，更要決定公司選擇哪間受託人，認真唔簡單！
他笑言：「我將啲錢投資落自己公司回報仲高！投資強積金唔划算，多數回報低，管理費又貴，我預咗蝕。」
MPF當股炒 輸鑊甘
中國銀盛資產管理董事吳家順擅長炒股，有「短炒王」之稱的他曾當強積金如同港股一樣短炒，結果痛定思痛，如今投資策略360度改變。他稱：「以往一周短炒積金兩次，現放長線持有。」說起強積金，他憶述慘痛經歷，「我早前揀錯咗中港股，真係好後悔！中港股一路跟住個市跌，蝕得太多唔敢轉，舊錢責死晒。」港股基金近年表現較差勁，過去五年年度化回報僅約1.2%，歐美以至日股基金回報大幅跑贏。
吳家順指，「無期望就無失望。有啲人仲慘，退休嗰年啱啱係○八年金融風暴，搞到蝕晒啲錢。」
半股半債攻守兼備
親子兒童理財專家李錦曾有一個神奇投資經歷，「我跟兩間管理公司供強積金，一間揀咗保守嘅組合，一半股一半債；另一間揀咗比較進取嘅，股票比例佔六至七成。前者竟有約10至13%回報，後者卻有虧蝕。」他估計，「可能唔同管理公司嘅基金唔同，同埋後者嘅管理費貴，最終得不償失。」
因此，高風險高回報並非必然，投資者要小心配搭積金。目前，李錦會按經濟大氣候、息口變化等因素選強積金組合，以求更好安排。
跟貼市況調整組合
大華繼顯（香港）研究部策略師李惠嫻（Hannah）告訴你，有多個強積金戶口未必是好事。「我轉過幾次工，有兩份強積金。舊嗰份啱我心水，我會睇緊啲；新嗰份就唔係好鍾意，所以無理過！」
她一向跟市況調配強積金。「幾個月前，見美聯儲暗示就快加息，即刻將債券投資減到零，強積金組合變到兩成亞洲股票、八成港股，全屬高風險投資。」
Hannah認同強積金制度。她指：「有強積金係好，可逼打工仔儲錢，同埋我覺得現行對老人家嘅退休保障唔係好夠。我建議『半自由行』改成『全自由行』，收費再減啲，基金選擇再多啲！」
瞓身港美指數基金
時富資產董事總經理姚浩然（Patrick）笑言，距離退休仍有一段時間，故會選較進取的投資，「我主力投資香港及美國指數基金。香港指數基金中，資金一半投資恒指，一半投資國指。在我可選的強積金組合裏，買指數基金較買債、貨幣基金等可取。」
Patrick一向對投資有心得，但說到強積金目標回報，他也摸不着頭腦。
「我唔知最終筆錢會滾到有幾大，點可以靠強積金退休呢！」他更表示，「我每半年至一年先會檢視積金表現，但都無咩留意佢嘅回報，因為啲錢暫時無得攞出嚟住。」