北水頭等倉：中海勝在攻守兼備
市場在觀望IMF討論納人民幣納入SDR結果，恒指在22,000點關載浮載沉。由於MSCI收市後調整成分股，臨尾一分鐘大市成交逾兩百億元，結果主板成交增至1,006億元，但千祈咪以為係資金率先入場博人民幣「入籃」，咁就真係表錯情！
現時人行的貨幣政策偏向寬鬆，市場流動性充裕，是確保內地市場穩定的重要因素之一。就如個別二、三線內房股，近月進行境內公司債券集資，五年期30億元人民幣，息率都係3.5至5厘，融資成本大降，理論上有利內房企業，但現時市場氣氛唔就，未見到二、三線內房有咩動靜，相信只要未來數月見到內地經濟數據持續回穩，呢個板塊遲早會來一次大反攻。
若怕二、三線內房股風險高，可繼續將焦點放在龍頭內房股身上，勝在穩陣兼有一定息率。好似中國海外（00688）現價25.7元，往績市盈率7倍，息率2厘，已公布的今年上半年業績，純利增長兩成至163億元。隨着產業政策有利行業復甦，即使計及未來一年人民幣可能再貶值3%，現時的估值還是進可攻退可守。
走勢上，近月股價成功企在25元樓上，50日線重上250日線，走勢向好，中線有望反覆向上挑戰30元關，回吐初步支持在24元水平。
司慕渢