絲絲講場：華熙趙總做生招牌
華熙生物科技（00963）專生產透明質酸，聽講佢哋主席趙燕（趙總）用咗自家產品十年。嗱，趙總好少公開露面，啱啱十一月絲絲見過趙總，對上一次已經係○八年上市時。啲產品點？睇過先……
趙總話，佢用咗透明質酸十年，但只係外敷，無打入皮膚底層。趙總本身讀生物嘅，之後做生意時接觸到研究團隊先開始用。咁即係幾多歲開始用？趙總唔講。年齡係秘密？Sorry，公司上咗市，年報就自然年年同趙總計住。
成日笑保持靚靚
趙總話自己皮膚好易敏感，所以好怕去美容院。不過有樣新嘢令佢踏出第一步去醫學美容院做，就係佢最近試咗隻新Facial叫水光針，係用細針開窿，再注入美容產品，趙總自己試咗兩次，佢話南韓Hit咗好耐。
啲酸同啲針咁深奧，絲絲唔曉，有冇啲簡單啲嘅？有。趙總仲有個保持靚靚秘訣，就係成日笑。趙總仲話好鍾意自己做緊呢個行業，因為可以令人變得更靚，「比賺多少錢更開心」咁話。