絲絲講場：Esprit搏盡谷數玩埋貼街招

旺角彌敦道貼海報有幾出奇？你有所不知。思捷環球（00330）旗下Esprit品牌，九十年代絕對係本地潮人Icon。紅成點？當年軟硬天師嘅歌都有句「永遠懷念興發街嗰間Esprit」，你話呢。傳說話當年啲潮人排隊去嗰度In做Sales，連軟硬都喺嗰度出身。

旺角銅鑼灣做試點

所以，近排行過旺角街頭，竟然見到Esprit今年秋冬季主題Poster周街貼，絲絲完全想像唔到。比着五年、十年前，呢個國際品牌又點會紆尊降貴到，喺吉舖外牆貼海報，側邊仲有唔少補習社街招同波鞋舖廣告。

到早兩日行過銅鑼灣，亦見到有吉舖外牆貼滿Esprit嘅Poster，再見埋業主喺啲Poster面撻多幾張「嚴禁標貼」告示，絲絲都有啲啲唏噓。

思捷回覆絲絲話，貼Poster只係一次性宣傳活動，由廣告公司負責，主要想宣傳中環全新分店開幕，佢哋話「做埋今次唔會再做」。

絲絲就咁睇，思捷自從掌舵人邢李(火原)退下火線後，公司一度群龍無首，不過之後佢哋兩任CEO都拋出改革大計，最近連以前未碰過嘅MK文化都試吓，好明顯係用盡一切方法想做番起個勢，變革嘅決心強到呢。如今最近回歸中環開旗艦店，希望係見到曙光，話晒絲絲當年都有份去興發街88號朝聖。