Market Insight：電池股強得有道理

睇番短期影響股市發展的消息實在唔少，下周一前，人民幣納入SDR，權重多寡將有分曉；跟住A股重啟IPO，初期熱到爆幾可肯定；跟住十二月中，輪到美國聯儲局議息，十年來首加的機會已是高唱入雲，之後聯儲局點演繹一六年的加息步伐，對美股後向舉足輕重。

橫睇豎睇，十二月金融市場都唔似會靜，睇過去一個月港股三次出其不意的挾淡，加埋一眾衍生工具的引伸波幅低企，十足十暴風雨前夕，與其唔知佢開邊瓣，倒不如等個市出現明顯突破，跌穿22,000點或上破22,800點，確認方向至追。

A股轉穩利好港股

當然，古勝認為十二月炒上較隊落機會大，如果純睇阿爺手影，無疑是信心十足一樣，重啟IPO之外，券商准買唔准沽限制都撤銷，A股的中期低位似乎已得到官方確認，有形之手從粗暴救市中退場。

睇番重啟IPO，鍾情抽獎的大媽唔單止齊聲讚好，首批28隻新股後，內地新股引入新玩法，可確認獲配數目先科水，新股客唔使再沽貨參加大抽獎，咁做對二手市場影響固然減到最低，講到底係形同阿爺鼓勵篤手指，新股重開好大機會熱到爆炸，唔多唔少對香港，尤其被稱為港A股的股份隨時絕處逢生。

綠地香港（00337）同奇虎360集團合作，拓展互聯網金融服務，昨早市炒過上3.52元創一個月新高，尾市升少咗收3.41元。綠地阿媽綠地集團同阿里巴巴旗下螞蟻金服，一向有合作網上金融產品銷售，且做得唔錯，綠地一直冀望轉型，最終把互聯網金融服務平台與地產生意剝離。

今次合作，綠地成為奇虎360旗下「你財富」平台的認可發行人，未來將包裝發行的互聯網投資及金融產品，經由此平台推出，奇虎360則負責協助推廣及結算工作。現時內地經濟增長失速，人行連環雙降，這類提供每年5至6%年度化收益率的金融產品，在內地散戶圈子需求不絕。

綠地現價風險有限

A股爆煲前，綠地攻網上金融的故事，搵到唔少大孖沙落疊，五月以每股7.46元批2.28億股，跟住個市發生乜事，再唔貼市都知。令唔少中資基金重創的綠地，批股唔夠兩個月插到2.97元，接貨最多揩六成。

綠地都唔係批完就闊佬懶理，七月初至今公司24次回購，仲唔係大大聲細細注嗰隻，十月最多一次達650萬股，九月亦見試過大手掃回818萬股。以往回購消息點都對股價有支持，但綠地回購卻愈買愈抵，七月最貴試過買到5.4元，之後試過買到落3元邊。點都好，昨日藉消息炒上嚟，3.41元仲係比近月回購的平均價低，現水平風險應該唔大，半年前綠地都係大媽港A股名單之內，企穩3.3元樓上，不妨睇實。

昨日表現最突出板塊屬電池股無疑，包括理士（00842）、光宇（01043）和超威（00951）等，未知是否與天能（00819）擬分拆電池子公司於新三板上市有關而湊熱鬧。天能昨亦升逾3%創新高，由八月低位計更在三個月累計兩倍，公司今年上半年盈利升4.8倍至2.69億元人仔，其一二年度最高盈利為7.1億元人仔。

電池股揚威主要是叨電動車的光，昨日亦有國際電動車展覽在香港博覽館舉行，比亞迪（01211）、五龍（00729）及中國動力（00476）等均有電動車亮相，但股價未見跟升。值得注意的是，天能和超威現時主業仍是鉛酸電池，前兩年割價鬥個你死我活，今年才回復增長，而電動車電池和鋰電池屬新興業務，股價飛升主要是憧憬成為未來增長動力。

中國動力不妨低吸

電動車核心技術在電池，現時各車廠均在研發電動車，對電池的需求可望快速增長；不過，電動車的前景主要靠政府補貼，有業內人士認為補貼實在太多，反而使企業為爭補貼，剝奪創新的動力。

此外，天能三個月升兩倍相當嚇人，光宇近期亦八連升，即使電動車前景多好，要高追也實在要冒太大風險。低吸的話可留意中國動力，剛公布中期虧損擴大，但主要是現時仍屬投資期，其「香港品牌」電動巴士將於下季試行，若運作理想有望取得香港巴士公司的訂單。

古勝