絲絲講場：英滙豐撐女性高管上位
五年之後，即係到二○二○年，滙豐要做到有一半高層係女性！係英國滙豐行政總裁西蒙斯講嘅，幾咁豪。雖則只係講緊英國，但絲絲聽見都覺得好鼓舞。
麥倩華掌英零售行
英國滙豐今次行得好前吓，事關依家好多大銀行一般都只係得五分之一高管係女性。
而今次英國滙豐仲唔係得個講字，佢哋會聯絡番啲以前因為要照顧小朋友而離職嘅女高管，睇睇佢哋有冇興趣回歸；英國滙豐仲會喺招聘時，試行以唔顯示性別方式嚟審閱應徵者履歷，以排除任何不自覺嘅偏見。
英國滙豐本身幾個大部門都由女性領軍，其中一位大員麥倩華（Francesca McDonagh）大家或者都認得，佢之前係滙豐香港個人理財業務阿頭，後尾調咗去中東嗰邊，依家係英國滙豐零售銀行及財富管理阿頭。
講開又講，滙豐香港呢邊先後亦出過唔少「一姐」，好似馮婉眉、李慧敏、梁高美懿、薜關燕萍等等；依家就有滙豐大中華區行政總裁黃碧娟，同埋新鮮滾熱辣嘅滙豐香港區一姐施穎茵咁。
余絲韻