絲絲講場：證券經紀劈炮有幾豪？

不過，證券行業卻出現怪現象，唔少從業員竟然唔等埋攞花紅與雙糧，就喺十一月份辭職，豪到呢。唔通出面真係大把世界，定係明年港股旺到你唔信？

港股大時代 花紅和味

絲絲收到料，有證券行近期有唔少人遞信，包括前線同後勤員工，計落條數，都有成5%咁多。再八吓其他嘅行家，一樣有啲啲呢個現象，大家覺得……唔，有啲嘢。

今年四月份港股大時代，雖然迅速玩完，但今年證券行整體都係賺到笑，份花紅（一般係明年四月派）一定好和味。有證券行今年改咗遊戲規則，今年十二月底前先出一個月花紅，其餘再喺明年四月份先出。

但班從業員都等唔切攞花紅，就急急腳喺呢個時候炒老闆魷魚，係咪好奇怪呢？唔會係嫌錢腥嘛？出年個股市係咪會好，大家都唔知。

市傳新證券行快招兵

唯一解釋，係佢哋有「好好好」路數，跳槽去也。市傳最近有新證券行密鑼緊鼓向證監會申請牌照，準備招兵，會唔會係同咁有關呢可。

今年年中股市好景時，證券業真係可以用紙醉金迷嚟形容。聽聞有啲經紀，一個月最少袋幾十萬元佣金，不過聽講咁高嘅佣金收入，都仲未入到十大排名喎，可想而知，今年第二季賺錢幾容易。

睇番證監會早前公布上半年券商盈利條數，各組經紀行（即A、B、C組經紀行）共賺近147億元，難怪當時有經紀豪言「上半年賺咁多，下半年唔使做都唔憂！」唔通真係無憂到，連花紅同雙糧都唔緊？

余絲韻