絲絲講場：私銀嘜住富二代講金兼講心

駕馭財富先叫使得啱

私銀為咗同呢班未來主人翁打好關係，落足心思，瑞士盈豐銀行（EFC）亞太區行政總裁趙善銓（Albert）話，EFC每年都會搞啲兩至三星期嘅財富管理Camp，每次大概20人，目標係讀緊大學嘅富豪後代。

使錢都要教？亂咁使梗係唔使教，使得精明就要學。喺Camp入面，理財專家會教點分析股票同基金之類，望班富後代明白「使錢唔止係買車買錶咁簡單，等佢哋之後識得Manage Wealth，唔係畀Wealth Manage番」咁話。

啲富爸富媽都想仔女出去見吓世面、出嚟見得人，所以EFC亦會搵專人嚟教班少爺小姐面試嘅技巧。仲考慮到呢班「繼承者們」要繼承家業，可能好大壓力，所以EFC連心理輔導都提供埋！真係全套服務（口架）。

品味慈善要同樣耍家

教咁多Hard嘢，驚悶親班少爺小姐喎。所以呢，Albert話EFC會軟硬兼施，教埋各位少爺小姐點樣品嘗紅酒同收藏藝術品；另外亦會搞啲投資比賽，Albert話投資本金係500萬蚊咁上下啦。係咪真金白銀呢？唔知呢。

咁近排又興教啲咩呢？原來教點「捐錢」。依家好多世界級富豪都會捐錢回饋社會，但其實捐錢係一門學問。Albert話「捐畀慈善機構？定信託基金好？捐得唔好，啲錢可能冇晒，兼達唔到預期效果」。嗱，呢啲教捐獻嘅專家仲有另一個重任，就係要代啲富爸富媽向班少爺小姐解吓畫，解咩畫？咪就係「點解要捐錢出去，唔留晒畀你」囉。私銀幾咁用心良苦。

註：O'Camp者，即是大學新生嘅「迎新營」。咁都要解？要o架，《絲絲講場》讀者群咁廣，絲絲絕對冇偏心。

余絲韻