絲絲講場：御藥堂靠沙士發圍

佢哋主席陳恩德（Mark）話，公司係佢位依家80幾歲嘅爸爸同Mark妹妹○二年開嘅，Mark當時喺同行做，但仲係學緊嘢嘅階段，所以就未返公司幫手。佢話當時公司規模好細，投資幾十萬開設。

到○三年沙士爆發，初期傳聞話板藍根可以醫到，所以當時公司啲板藍根貨去得好快，要24小時搵貨源畀連鎖零售商，忙到要喺公司瞓。雖然最後證實板藍根對付唔到沙士，不過都令佢哋做咗好多生意，令公司規模壯大。

轉板送蟲草「進化版」

公司尋日由創業板轉至主板上市。Mark話以前創業板個上市冧巴「08185」係抽嘅，冇權揀；依家主板個上市冧巴「00932」係自己揀嘅，係「搞生意」咁解。

尋日佢哋送咗個放大N倍嘅冬蟲草紀念品畀港交所（00388）。喂，創業板上市嗰陣，咪已經送過一次囉？Mark話創業板時送嘅，係蝙蝠蛾科幼蟲「進化中」未完成嘅冬蟲草，尋日送嗰條係「進化完成」嘅冬蟲草。I see，原來唔同嘅。

余絲韻