北水頭等倉:光大銀行搭轉順風車

雖然內地放聲氣話要重啟IPO,但A股昨日不跌反升,滬綜指突破3,600點。不過,港股仍舊弱勢,中段反彈過後,尾市又要捱沽,恒指跌逾百點收場,國指亦低收作結,表現令人失望,某程度反映外資對A股升市仍然缺乏信心。

內地文化產業概念投資熱潮不斷升溫,見到昨日個別相關股份亦有異動,如新華文軒(00811),股價一度搶到上7.69元,收報7.58元,升16%,成交大增至逾5,400萬元。

呢期A股唔單止內地券商股翻生,就連內銀股表現都幾唔錯,昨日中信銀行A股(601998.SH)便漲停板,而其H股(00998)則升1.7%,收報5.25元。阿爺要做嘢,冇人能阻擋,更何況經歷救市一役,重磅內銀股街貨已盡落國家隊手中。睇好阿爺繼續托市,不妨順勢留意內銀股表現,其中光大銀行(06818)首九個月賺238億元人民幣,按年增長2.3%。

老實講,論基本數據,呢隻股唔係一線內銀,亦因為咁所以估值較低,市帳率0.8倍。見昨日股價逆市上升,成交增加。若然內銀板塊氣氛持續升溫,光行呢浪主要阻力在4.25至4.4元區域,失守3.7元止蝕。

司慕渢