絲絲講場：無名小卒靠中國贏歐洲股神

話說富達基金一三年中公布，由Dale Nicholls接替「歐洲股神」安東尼波頓（Anthony Bolton）掌管旗下中國特殊情況基金，當時市場對Nicholls幾乎一無所知，淨知佢出生澳洲，嗰時45歲，「無名小卒」係咁畀人潑冷水。

雞仔注 回報達38%

「無名小卒」一四年四月正式接手以來，中國股市Chok到人人自危，但佢個基金回報竟然去到38%，幾乎係同期MSCI中國指數回報嘅一個Double，就算近期股災，佢基金今年回報仍有約4%，跑贏同行成條街。

睇番「歐洲股神」安東尼波頓，一○年主理中國特別情況基金，點知第二年已蝕超過1/3，搞到佢英名盡喪，埋單引退時仍蝕19%。

Nicholls就唔同，佢傾向逐少逐少買兼建倉極慢，好似阿里巴巴一四年上市時，人人衝住追入，佢反而等股價跌低16%時先慢慢入貨，到阿里股價累升75%時就大手減持。

聽講Nicholls尤其睇好中國消費同埋互聯網股，現時揸重上海機場（600009.SH）同埋美國納斯達克掛牌嘅網易。

余絲韻