絲絲講場：財星度周末備戰出奇招

絲絲又問咗幾位財圈人，睇吓佢哋周末又習慣做啲乜嚟為下星期備戰，發覺佢哋都有一個共通點，就係就算放假都唔會畀個腦休息。

專家話，周末首要做嘅嘢，就係瞓足啲。習慣周末先嚟瞓少啲蒲夜啲？咁就出事，唔夠瞓，唔單止影響下周情緒同思維，連心臟病、糖尿同中風嘅風險都高啲。你諗你。

煲偵探劇練轉數

不過，亦唔好齋掛住瞓，專家話周末記住要玩，咁先可以Refresh個頭腦，連股神巴菲特閒時都彈吓Ukulele小結他啦。君陽證券助理研究經理羅湋楠（Kathy）放假就好鍾意留喺屋企煲劇。浪漫愛情片？No喎，而係偵探劇集！

Kathy話，講查案嘅劇集先夠刺激，可以推理兇手係邊個，Keep住個腦嘅轉數。佢平時工作需要研究同分析好多數據，煲偵探劇仲可以訓練埋分析思維添。

專家又話，最遲周日晚好Plan定下周安排。呢樣，凱基證券投資顧問部副總裁麥嘉嘉（Avis）就完全做足。

排Schedule揀定衫

Avis除咗分析員嘅工作之外，成日都要出鏡接受訪問，工作排到密密麻麻，所以逢周末晚佢就會排好Schedule，睇清楚下周要做啲咩。最重要嘅係，佢一定Plan好下一周着咩衫出鏡，費事畀觀眾見到佢着同一件衫咁話。

睇實美股搵啟示

周末仲有樣必做嘅，專家話要睇吓個大局，包括檢視吓自己職場與個人進展。講到睇大局，晉裕環球資產管理投資研究部董事林偉雄（Andy）連放假都無抖。佢話周六要睇實美股收市同美國預託證券，睇吓有冇啲影響港股開市表現嘅啟示。佢又話近排人行好鍾意周末先「做嘢」，有時連行行吓街都要睇東網Money18嘅即時新聞，再返屋企做功課。

點解周初流流就講周末應做咩？Blue Monday囉，絲絲藍到要搵解藥咁啫。話時話，專家呢幾招，絲絲一樣都冇做到，唔怪得之咁。

專家話，以下五招，周末做咗，包保星期一順頭順路：

1瞓足啲

2記住要玩

3寫低3至5項值得感恩嘅嘢

4宏觀檢視吓自己職場與個人進展

5周日晚好Plan定下周安排

余絲韻