絲絲講場：飛達帽后諗通唔想死

近排打開報紙（冇錯，絲絲係報紙同紙本書嘅Die-hard鐵粉），睇見一單又一單悲劇，絲絲心悒到唔想抬頭向天望。原來，人稱「帽后」嘅飛達帽業（01100）副主席顏寶鈴（顏太）都係過來人，佢仲坦白講「曾經諗過死」，不過之後畀佢諗通咗，仲對人生有新體驗添。

顏太話，公司上市初期業績唔錯；到○七年全年賺4,170萬，但佢已經覺得同○六年比少咗52%，已經唔多開心；點知，○八同○九年更加要蝕錢，分別蝕2,925萬同4,513萬，更加覺得自己好唔掂。蝕幾千萬，顏太真係好在意，仲話「真係有諗過跳樓」。

好在，佢當時有畀空間自己，佢諗深一層，自己死咗邊個接手公司？總唔可以留「蘇州屎」畀老公，要老公接手做即係玩佢。仲有，邊個照顧兩個寶貝仔呢？嗰一刻Feel到自己對老公同兩個仔好重要。結果，顏太繼續咬住牙關咁過，佢就係咁，唔肯輸畀自己，到一○年扭虧為盈賺番567萬添。See，都話希望在轉角。

唔認輸嘅性格仲可以令50幾歲嘅佢，隻身飛去孟加拉起廠。佢話孟加拉都幾落後，佢唔鍾意食咖喱，嗰餐飯有隻鹹蛋送吓，就已經好開心。佢仲同絲絲講，做人一定要有激情，人生真係要有搏盡嘅時候。

顏太仲認，以前好怕畀人知自己失敗；但佢依家諗通咗：失敗，唔怕講人知，唔怕同人分享；佢仲明白到：走咗，係解決唔到問題嘅。

都係嗰句，停一停，諗一諗，希望在轉角。絲絲都係過來人。

余絲韻