絲絲講場：機械人財管顛覆金融界

兩年掌管逾千億資產

花旗上星期出咗份報告《機械人崛起︰零售革命》，當中講話，十年後全球會有5萬億美元資產係由投資顧問機械人嚟管理，5萬億美元（約39萬億港元左右）即是幾多？大概係依家全香港銀行嘅港元存款嘅七倍幾，總之啲零多過你所有手指。

唔係靠嚇，有數據有真相。花旗數據顯示，機械人管理嘅資產規模，喺一二至一四年短短兩年間，由一個仙都無，爆升到140億美金（約1,092億港元）。

基金資管恐大規模執笠

嘉信理財年初推出咗機械人主理嘅網上理財服務；全球最大基金公司貝萊德亦唔執輸，連研發嘅時間同工夫都慳番，索性買現成，佢哋早兩星期就收購咗FutureAdvisor，呢間係喺加州做自動化投資嘅Start-Up（初創公司），連紅杉資本都係佢客仔。

花旗於是推算，去到二○二五年，機械人就會管理5萬億美元嘅資產，到時投資顧問費跌硬，歐美隨時有成堆基金同資產管理公司要執笠。

不過，做財富管理嘅機械人，通常喺根據你填好嘅問卷，自動分析市場嘅大數據，運用現代投資組合理論等嘅方法嚟投資，唔會同你三口六面傾點做。

吓，冇得傾？對於大把錢嘅客，何止要有得傾，仲幾時都要有專人同佢傾。嗱，呢樣正正就係機械人目前做唔到嘅，所以花旗個報告都話，財富管理唔會完全畀機械人取代喎。花旗咁講，會唔會係佢本身都要提振吓軍心呢可。

余絲韻