「工欲善其事，必先利其器」，不過，內地人行貨幣政策委員會委員樊綱直頭講到話，冇4個電腦芒，就冇資格炒股！咁就……
樊爺仲話散戶應該退出炒股，話炒股有風險，而且係專業嘢，所以「沒有4個電腦屏放在那兒，你都沒資格炒股」，點解要有4個芒？樊爺話「你得看這個指數、那個指數」咁喎。
樊爺嘅意思，簡單一句係，平民百姓未夠班，炒股呢啲粗重嘢，應該留番畀機構嚟做，因為機構先至專業。樊爺無非想話內地股市仲未成熟啫，身為人行智囊嘅樊爺此言一出，絲絲唔係內地股民，都一樣幾咁感受到阿爺嘅關愛。多謝晒。
話時話，一個「東網Money18」App，揸住部手機，N個指數即時睇晒；就算嗰位大賺2.6億港元日本散戶股神，都只係用一部iPad篤篤吓。絲絲好想知，4個芒有幾專業？又，點解4個芒？唔係3個或5個芒呢？
余絲韻