絲絲講場：溫傑睇市打孖「出貓」
債王格羅斯以前有隻貓女阿Bob幫揀股，新鴻基金融集團財富管理策略師溫傑（Kenny）亦有兩隻估市貓：大哥薯薯夜晚會陪Kenny睇Report，佢哋間中會傾吓股市，而細佬米米就淨係識食；兩隻貓貓都係Kenny嘅私家策略師。
兩隻貓貓都係Kenny領養返嚟。睇大哥薯薯嘅心情可以知道股市升定跌。Kenny搵過動物傳心師同薯薯傾過，發現薯薯真係有靈性，所以Kenny帶米米返嚟之前，有問過薯薯願唔願意做哥哥。
債王隻貓女識揀股
細佬米米得五個月大，淨係鍾意食，對股票嘅興趣就冇咁大。貓奴Kenny對呢對「主人」好好，畀間房佢哋住，仲有廿四小時冷氣。
債王格羅斯隻貓女阿Bob唔止生得靚，仲識揀股！債王話講：「我成日都會問佢寵物食品股嘅意見，佢時時都會應我，喵一聲就即係『唔好』，喵兩聲就即係『買啦』。」債王仲講過，雖然阿Bob對息率走勢冇咁熟，但問吓都無壞嘅。可惜阿Bob舊年返咗天國，債王傷心到要「夢中見」咁話。
咁Kenny嗰兩隻「私家策略師」呢？聽講佢哋啲情緒好貼個市，Kenny分析基本因素同技術分析外，都會「參考」吓佢哋嘅意見。薯薯仲直頭喺Kenny個facebook度預測股市。
呢兩隻「私家策略師」準唔準？算吧，有啲天機，係貓奴先收得到，唔係人人得。
余絲韻