絲絲講場：冼博德「退隱」 倫敦開書店

睇怕大家都唔細，係時候睇番啲成人嘢，咪諗多咗，絲絲係講緊人大咗會面對嘅生活現實。

店名「Log Off」有意思

故事主角係渣打（02888）前任CEO冼博德，佢雖然係渣打做得耐嘅高層之一，只因未能扭轉兩年盈利倒退，而被股東施壓落台，佢六月正式離開渣打退下火線，有消息話佢之後會同太太Betsy Tobin喺倫敦一個小區開間書店仔，佢仲幫書店註冊咗個名叫「Log Off Bookshop」。

「Log Off」意思解作「登出」、「退出」，呢個係冼博德嘅心聲？已經厭倦金融世界嘅紛擾？定係曾經喺銀行界叱咤風雲、但只53歲就被震落台嘅無奈？佢太太嘅新書個名可能答到大家：Things We Couldn't Explain 。

當然，你又可以咁睇，呢個係一個鐵漢柔情嘅故事，佢一早打算同作家太太一齊做文青，所以揀喺倫敦阿仙奴球場附近一個幽靜小區，同自己屋企只係幾步路距離。兩公婆每朝拖住手去小書店開舖，就算無過千萬年薪，都絕對係小確幸。你又揀點睇？

余絲韻