絲絲講場:大鱷一鋪翻身
人仔話貶就貶，幾咁無情，好多堅信人仔只升不跌嘅，何止O晒嘴，直頭傷心。若然你望住人仔定存，個心仍在淌淚甚至滴血嘅話，呢篇文，你千祈千祈唔好再睇落去，事關以下講嘅係，有人多得人仔貶值，佢先有機會起死回生，短短兩日勁賺近8億蚊。嗱，你再睇落去，有乜唔關絲絲事。
凱雷旗下芬佬唱衰三年
呢個賭中人仔跌，令人葡萄又葡萄嘅贏家，就係凱雷集團（Carlyle Group）旗下嘅對沖基金Emerging Sovereign Group所管理嘅Nexus Fund。
Nexus由Brian McCarthy揸旗，McCarthy由二○一二年開始就一直睇淡內地，話內地經濟增長係幻象，遲早有大調整。究竟係眾人皆醉佢獨醒，定個個醒時得佢傻？絲絲唔敢講，只知個Fund幾乎年年蝕，去到上個月都仲蝕緊11%。
人人諗住人仔會繼續升值時，Nexus反而睇跌，勁買人仔Put Options（認沽期權）。
終於，畀Nexus等到。上星期人仔一貶，Nexus短短兩日就大賺咗1億美元，即是成7.8億港元！聽講佢哋截至今個月中，扣除使費後回報率達50%，賺凸之餘仲補番上半年蝕咗嘅，絕對一鋪翻身！
不過，以上都係帳面數，未知有幾多真係賺到落袋，事關聽講幾日前佢哋仲未割禾青。咁，唔知安唔安撫到你顆葡萄的心呢？
余絲韻