絲絲講場：內企港上市 高管再培訓
內企高管為咗嚟香港上市體體面面，唔少事前都會「地獄式」特訓，苦功分分鐘多過啲選美佳麗。專幫新股上市嘅博達浩華創辦人兼總裁張力仁（James）話，除應對技巧外，連面部表情、甚至交換卡片同食西餐禮儀，公關都會執。
須防多口 切忌黑面
James話，香港媒體眼利，問嘢又尖銳，內地高管未必慣，所以會提住啲高管，就算聽到咩都千祈咪「變臉」，保持微笑，多啲講「多謝你嘅問題」、「以下由某某回答你嘅問題」呢啲。
佢哋出嚟見人前，會排練Q&A，問題少則50條，多則冇百幾條落唔到樓，仲會有大型綵排，投行會嚟埋做觀眾添。
通常出事位就係未來嘅財務數字。James話試過有個黃金交易公司客，一個唔小心，向傳媒講咗未來金價預測，好彩公關出手搞番掂。
余絲韻