絲絲講場：滴滴搶紅米新機 快過官網
米粉等到頸都長，終於等到紅米Note 2。小米創辦人雷軍話，紅米就係小米嘅青春版，所以新機嘅顏色青春啲、價錢平啲咁，絲絲覺得好合理，唔算咩驚喜。不過有樣嘢，確實連絲絲都要停一停、望一望，就係紅米竟然可以同「滴滴打車」拉得埋！
話說，八月十六日紅米Note 2登場當日，滴滴打車App同小米官網都會係首發平台。冇錯，就係內地最大打車軟件「滴滴快的」，唔通米粉要鬥快Call的去搶紅米新機？
滴滴早兩粒鐘開售
原來，滴滴打車一早已經喺微博擺咗張卡通圖出嚟「放風」，寫住「美好的事情，即將出發」，仲話「未知的驚喜，才叫美好」。呢個驚喜尋日終於開估，就係「滴滴一鍵叫小米」。滴滴將會提早兩個鐘開售同配送部分紅米Note 2手機。即係話，當日透過滴滴打車App搶購新機嘅米粉們，有機會提早兩個鐘搶到手，咁咪快過官網？不過，Sorry，聽講只喺北京地區。
余絲韻