絲絲講場：李寧智能球鞋叫「小強」

「小強」係咩意思，李寧都話「你知我都知」。絲絲心諗，明知香港地叫曱甴做「小強」，唔通係想話公司以曱甴打不死之身重現喺大眾眼前咁有寓意？點知李寧話，新系列想針對年輕消費群包括大學生，至於覺唔覺「小強」個名好奇怪？

李寧竟然話，世上好多事都奇怪，但未必每個人都覺得奇怪喎。果然奇怪。

品牌倡運動員精神

記得五年前，公司幾咁高調重塑品牌，又換Logo又將口號由「一切皆有可能」改為「Make The Change」，依家驚唔驚畀人話公司去返幾年前？李寧話公司唔會重複過去三、四年嘅境況，又解釋話口號歸位，係因為佢自己運動員出身，希望品牌可以激發大家發揮運動員嗰種不斷追求嘅精神。

呢幾年，絲絲睇住私募基金TPG合夥人金珍君一二年入主公司，至上月金全退，由創辦人「體操王子」李寧話番事。絲絲尋日見王子精神爽利不單止，連以往個白髮Look都唔見咗，直頭似去返幾年前。

叫人「換雙芯跑鞋」

王子重出江湖下，上月公司推出嘅智能跑鞋個名幾咁熱血，叫做「烈駿」同「赤兔」，不過，絲絲諗住去佢哋網站捧場，見佢哋叫人「換雙芯跑鞋」，絲絲已不知幾咁傷心，今次仲有對「小強」嚟緊……王子，搞Marketing時，咪唔記得香港市場啊！

余絲韻