Market Insight：體品股只宜博反彈

大家信唔信都無所謂，但對比中美財金決策，一個語不驚人誓不休，一係唔做，一做震動全球，一個循序漸進，順着金融市場預期發展，粗疏與圓滑手碗形成強烈對比，市場風險溢價長期未能收窄，並非無因。

人民幣的突然貶值，最明顯不過是見到街上的找換店，將買賣差拉闊到7至10%。講到尾係睇唔通仲要跌幾多，不願囤積人民幣，僅做單邊賣出生意。

又估唔到係連上市公司都中招，時裝零售店I.T（00999）發盈警，就近日人民幣匯率波動，手上11.87億元人仔定期存款，預計錄得匯兌虧損約6,000萬港元，對八月底止半年業績有重大負面影響，結果昨股價急挫5.7%，市值蒸發1.7億元，一日跌凸匯兌虧損。

匯兌虧損響起警號

睇年報，二月底止I.T現金等值資產有22.9億元，淨現金5.57億元，對比剛披露手上定期存款規模，大致可以想到，因港元借貸便宜，I.T選擇維持相當比例的人民幣定存以賺取息差，過去兩年其銀行存款利息收入為4,025萬元及5,904萬元，大約等於同年股東應佔溢利14.4%及18.9%。

中國匯改十年，人仔兌美元及港元連年升值，加埋港美零息的優勢，坐住人仔博財息兼收之士實在不少。金管局數據可見，一○年至今，香港人仔存款由幾乎翻三番去到近萬億元，仲未計抬錢過埋深圳河博高些少利息的散戶。

唔少人甚至上市公司慣性以為人仔穩賺不賠，今次突然貶值，人仔匯價兩日高低位相差近2,400點子，唔單止殺匯商一個措手不及，可以預期，像I.T一類以為安全，坐燶匯的公司會陸續曝光。看官手頭上有現金比重高的股份，最好搵搵年報睇睇佢資金停泊安排。

港匯由早兩日最恐慌一刻的7.764，回到7.752左右，回到貼近強方兌換價，可見過去兩日震盪，市場心理因素大於實際走資可能。姑勿論點，港股信心脆弱是路人皆見，恒指昨僅升102點收報24,018點，扣除騰訊（00700）一隻貢獻154點，換句話，只計其餘49隻藍籌的話，個市仍然未止瀉。

聯想績差大致反映

隊得最甘的聯想集團（00992），一跌就9%，首季業績少賺五成一至1.05億美元，同時宣布全球裁員3,200人。成績表中，最致命係個人電腦銷售放緩，經營邊際利潤率收窄，以及伺服器業務及摩托羅拉兩宗收購的後遺症──巨額攤銷開始浮現在損益表上。

近排微軟推Windows 10，市場反應認真麻麻，對個人電腦換機潮猶如潑咗盆冷水。內地智能手機出貨量較過去兩年增長有明顯放緩迹象，惟聯想股價也預早反映，由四月大時代高位14元樓上落到7.7元，幾乎跌近一半。睇番一四年頭低位7元水平起步，開始扶搖直上，應該是中長線一個重要支持，如果再插多浸可以睇位博吓反彈。

匹克體育（01968）半年成績表，賺1.76億元人仔，升45.3%，每股盈利8.37分，派中期息8港仙，比去多一倍，半年派息比率達七成五，認真慷慨，昨股價升8.6%收報2元。

匹克蟹貨等住鬆綁

分析員估匹克全年賺3.97億元人仔，以去年上下半年佔全年純利38%與62%的比例，達標的機會仲係甚高，9倍PE左右，當然唔貴兼且抵博。但先旨聲明，經過最近呢兩個月，古勝對佢唔多唔少有啲戒心。皆因六月中匹克趁股價炒到四年高位，見2.94元，跟手大折讓批股，配股價每股2.48元，集資6.8億元，街客與大孖沙被殺個措手不及。

雖然話批股撞正股災，殺到落1.38元唔怪得邊個，不過折讓之大，意味四、五、六月高追的全部要坐艇。但更得人驚係，揸住近29億元人仔淨現金都仲係要錢。短炒如果彈到去批股價附近蟹貨區，看官要見好就收。

古勝