Market Insight：基金大戶極度看淡

港股昨日再插582點收報23,916點，基金大戶恐慌氣氛瀰漫魚缸。過去幾年享受人民幣升值，狂借外債而收入主要是人民幣的內房及航空股，借用阿松金句：恐怕「有咁耐風流，有咁耐折墮。」就算客觀睇，過去兩日跌幅已經有點誇張，但人民幣貶值潮開啟，相信會持續一段日子直到外貿好轉，短期應小心為上。

A股唔多跌，港股卻四腳朝天，主要係唔少中港兩地同時參與的中資基金，眼見A股有阿爺托住而香港無，例如金融股，有A比H貴的情況，也願意畀多少少溢價買個心安，選擇將港股當ATM。結果，七月八日股災啱啱滿月，又嚟過新一輪股票大平賣，班中資大佬又再要錢唔要貨，前日人行突然宣布貶值後，恒指飆見24,924點見頂起計，兩日指數高低位來回跌掉過千點，認真誇張。

市場信心蕩然無存

昨日四點後，期指仲要插到近200點低水，可見唔少大戶見現貨未沽齊，大低水都要質住期指戥倉，對後市悲觀之情表露無遺。

短短日子，中國暴力救股市，再推新一輪國企改革，發改委開turbo審批新基建項目投資，人行注資過萬億人仔落國開行準備大興土木，到周二，比市場預期來得更早的貶值，可以話，個市諗到、預計到，對中國股市與經濟有正面刺激的，北京統統做齊，個市卻要揀為淡而淡唔領情。

一來提振措施有滯後情況，可能到第四季先見到效果，但講到底，七月初暴力救市眼高手低肉肉酸酸，一陣查惡意沽空，一陣又話唔准國家隊沽貨，市場信心早就蕩然無存不無關係。如今出動到貶值，被視為壓根箱的本領都出埋，一樣隊到開巷，可見個市完完全全是情緒主導，雖然跌過龍味道極濃，但博反彈要有捱價心理準備，唔想太過冒險，穩陣計都係等個底見咗至算。

講番股事，阿巴里里宣布以283億元人仔投資蘇寧雲商（002024.SZ），成為第二大股東，蘇寧事後會斥資140億元人仔認購阿里新股，雙方計劃建構線上線下的零售服務結盟。

國美令人再有遐想

表面睇，成件事都不涉及香港上市的股票，但古勝卻唔係咁睇。國美電器（00493）同蘇寧鬥生鬥死咁多年，近年國美由線下走到線上，開始見到成績就快止血，捱打的對手居然搵到一步登天的捷徑，搵到阿里大碼頭，對國美來說，未來競爭更加激烈。

消息偏向淡淡哋，周二國美股價仲可以炒上1.61元先回落，昨日大跌市異常硬淨，升三格才散場，唔通個市真係賭國美將會有樣學樣，搵騰訊（00700）、京東等結盟？

從近期阿里巴巴投資取向，無疑見到全力由線上拓展返到線下的實體商業世界。事實上，阿里亦心知肚明，股票高昂估值，唔印公仔紙四出收購更待何時！印股票的成本只是油墨、紙張，低無可低，相反買任何生意，都會為資產與盈利帶來即時好處，情況就如當年香港電訊被盈科以印公仔紙吞併一樣。

藉着與蘇寧合作，唔少分析都認同，阿里主要睇中蘇寧1,600間家電店的龐大銷售網絡，以及全國物流配送能力，相比起阿里自行發展，慳番不少時間。阿里揚言，透過蘇寧的物流服務，將來可以達到最快兩小時內送達的目標，亦可借助售後網絡，做到安裝、維修及退換等一條龍式服務。

阿里終要面對現實

消息公布之後，首當其衝是商業模式接近的京東，連續見兩日裂口低開，隔晚在華爾街股價再跌6.7%至28.02美元，創近五個月低位。

記得兩年前馬雲豪情壯語，預言中國電商冒起，可以拉倒一線城市商舖租金高昂的情況。睇相佬呃你十年八年，估唔到一上市，轉過頭阿里自己就急急落地，何其諷刺也。承如昨日透露正與阿里及京東洽商策略聯盟的利標品牌（00787）高管所指，阿里與京東僅有是平台，卻是沒有內容。

古勝