絲絲講場：Google新帥上位 多得Twitter?
前日一場世紀重組，Google頭頂多咗個Alphabet，搵火「郯一郯」啲字母，絲絲隱約睇到「Alpha-Bet」，即是分分鐘係鋪「大賭注」，呢鋪邊個輸未知，但贏嗰個就一定係升做Google新CEO嘅披差（Sundar Pichai），以下係佢極速上位奇技大公開。
齋睇起跑線，佢絕對贏唔出。今年43歲嘅披差，出身印度一般過一般嘅家庭，要同兄弟齊齊瞓客廳地下。佢由印度讀科技開始，一路讀讀讀讀到去美國名牌大學，何止碩士、MBA，連學者都做埋。
佢○四年加入Google，初時只係做個產品經理，之後跟過當年仲未過檔雅虎做CEO嘅邁耶，披差○八年帶頭推Chrome，掂咗，一路升升升，舊年成為Google創辦人佩奇隻右手。
披差喺公司做咗十一年，辦公室政治？佢完全駕馭無難度，絕招係「務實」、「低調」同「絕不樹敵」。有前同事爆料話，披差開會時成日坐喺後面，默默咁聽每個人意見，再提出大家都接受嘅方案，佢多人Like就梗。
頻拒挖角終於彈起
四年前Twitter向佢挖角，結果Google加咗佢好多好多人工。早排再傳Twitter又想撬佢做CEO，結果又係多得Twitter，佢咪有今日囉。不過，Google官方講法，話公司支互聯網大旗，早喺舊年已經由披差擔起咗，換言之佢為今次升職，已做足一年功課咁喎。
余絲韻