絲絲講場：港交所改網站要三Click到位
港交所（00388）網站一向勁高點擊率，自從港交所一二年底收購了LME後，集團瓣數愈來愈多，網站資訊亦愈加愈多，股民有時想搵料，都唔知放咗喺邊。絲絲八到，港交所打算將網站大變身，目標係股民最多Click三下就可搵到想要嘅資訊，慳番啲時間。
變身工程搞兩年
港交所依家正公開招標，重新設計港交所集團網站（hkexgroup.com）同港交所網站（hkex.com.hk），八月尾截標。幾時變完身？呢個偉大工程需時18至24個月，即係起碼要到一七年至完成。兩年啫，眨眼就過。
今次港交所翻新網站，除咗想三Click必達外，另一個重點係技術重整，依家個個都手機、板腦不離手，新網站會自動偵測到最適合用家嘅版面。
搞App仲要慢慢傾
話時話，今時今日乜都有Apps（應用程式），但好似唔覺有港交所App喎？查實，港交所旗下依家有3個Apps：股票期權、LME、港股通。佢哋亦研究緊是否搞埋港交所App，不過Apps要有互動性先有意思，但佢哋又唔打算將股票報價放入去，若要發放資訊，港交所依家已通過多個社交平台做緊。所以，搞港交所App，要從長計議，睇吓要有乜功能。
至於港交所個王牌網站，即舊年閱覽次數有成4.52億次嘅「披露易」，今次變身冇佢份喎。
余絲韻