Market Insight：電訊股息率夠吸引

外媒報道，中國證券金融公司尋求5萬億元人仔作為支持股市之用，包括此前已獲得的2.5萬至3萬億元人仔。高盛高華分析師估計，六至七月期間國家隊已花費8,600億至9,000億元人仔入市，相當於總市值1.6%，預期整個救市行動資金規模為2萬億元人仔，估計市況會在3,000至4,000點有支持，4,500點會有沽壓（亦即救市初，揚言官股可以放出街的水平）。

港股抖暑一樣，恒指得207點波幅，主板成交縮到得673億元，再創大時代之後新低。恒指跌138點收24,375點，基金經理見A股短期內已封頂，外圍新興市場撤資潮又山雨欲來，入市意欲跌到冰點。昨逆市有5隻創52周新高股份，兩隻純收息股，包括越秀房託（00405）及港燈（02638），可以見到個市幾咁無嘢好買。

水泥股再升，但海螺水泥（00914）抖氣，輪到中建材（03323）及潤泥（01313）發力，分別升2.5%及3.8%。傳中國新電改五大配套文件可能要再徵求一輪意見而延遲公布，幾隻電力股捱沽，華能（00902）、大唐（00991）、潤電（00836）及華電國際（01071）跌幅介乎3.8至5.2%，近排升幅一鋪過跌番出街。對住今日唔知聽日事的國策股，有時確實令人幾氣餒！

波羅的海乾散貨運指數（BDI）創今年高位，無嘢好炒下，航運股趁機燒冷灶。中國遠洋（01919）升7.9%，中海發展（01138）升4.7%，中海集運（02866）都有1.6%進帳。

BDI報升或屬虛火

美國退市，加上年底前加息預期升溫，近排全球大宗商品價格跌到七個一皮，拖累埋新興市場貨幣都浪接浪創十六年新低，仲要加埋中國官方製造業PMI短期跌穿50的擴張線機會相當大，多少可見，製造業與新興市場外貿一池死水，與鐵礦石、煤炭、糧食需求盛衰周期掛鈎的波羅的海指數，點解半年內由五百多點升到依家千二點翻一番，真係一個都市謎團。

睇淡商品與新興市場抑或睇好航運業復甦，邊個睇啱，邊個睇錯？衡量賭注與往績，古勝相信BDI指數好似一一年及一三年純屬虛火挾期貨淡友的機會仲係比較大。

運動用品股能夠最先走出七月初跌市，率先破頂的確唔係無的放矢。安踏體育（02020）半年業績賺9.65億元人仔，升20.2%，整體毛利率升1.5個百分點改善去到46.6%，創近年新高，主要多得服裝毛利率升4.5個百分點去到48.3%，抵銷鞋產品的回落帶動整體毛利率改善，加上廣告及宣傳開支控制得宜，存貨及應收帳周轉率都有改善。

安踏中期成績表可以挑剔地方唔多，唯獨股價由年初低位12.52元起步，累積升幅六成二，跑贏個市幾條街，短期好消息盡出，21元又見頂到實，捧場客可以考慮短期食胡，等股價返到18元附近先再諗。

月費提升 和電大賺

本地電訊商齊齊取消無限上網月費計劃，算唔算趁火打劫自有公論，但智能電話的普及，依家數據使用頻繁，電話月費亦愈來愈貴。

和電香港（00215）半年賺5.08億元大升57.2%，每股賺10.54仙，派中期息5.2仙。業績急升的另一亮點，是蘋果公司的iPhone 6大賣，手機硬件銷售，由一年前的20.9億元翻兩番，去到今年上半年的71.5億元所致，令整個流動通訊EBIT，由3.08億元勁升至5.52億元。

假設全年派息，保持中期的22%增幅，全年和電股息0.158元，以3.22元股價，息率近4.9厘。中期成績中，比較難明係和電去年才主打中高端用戶，近期又翻推低價月費學生計劃，到底係驚客戶流失抑或其他長遠養客的策略，姑勿論點，以一門經濟周期影響較細的生意，業績後反高潮，回到3.2元左右，息率已夠吸引去息誘一眾好息之徒。

古勝