絲絲講場：陸東唔搞FUND轉做「玩」家
星級分析員陸東近日忙於屋企嘢，話暫時無諗搞番基金。「暫時」即係……？佢話即是一、兩年內唔搞。唔搞，唔代表唔講，佢近排就講話投資乜都要先有興趣。咁陸東自己嘅興趣？係收藏古玩，仲專到只揀晚清道光時期嘅。
不過陸東話古玩只係興趣，未算係投資。啲興趣會唔會最終回報好高變成投資？佢話唔知，不過佢話凡係對某樣嘢好大興趣，喺嗰度搵到大錢機會就會大大提升。事關有興趣，就會睇好多書見好多專家，咁先會精。
外公啟發 十歲玩古董
陸東10歲就開始「玩」古玩，第一件係個道光方壺，係佢外公送畀佢嘅。佢外公當年做地產，香港淪陷時有個租客無錢交租兼要搵水腳返鄉下，外公就用幾個大洋向對方買咗呢個方壺。
到12、13歲，陸東仲成日自己一個「貢」去荷李活道，將儲埋儲埋嘅利是錢同零用錢去尋寶。即是大家仲蒲緊機舖時，佢已經同古董舖經紀講緊價。
專攻道光 免花多眼亂
點解佢獨沽一味專攻道光時期？呢樣就關佢Daddy事。佢Daddy係做銀行嘅，Daddy啲朋友（即是啲Uncle）教佢話重點係要「精」，要專注一個時代，唔好人哋叫你就漢、唐、宋乜都買啲咁雜。聽完，絲絲都問咗自己一句，10歲時做緊乜。
余絲韻