Market Insight：電訊股扭轉弱勢

國際金價向下，利淡的原因一大堆。誠如高盛所言，中國唔係黃金的救世主，在全球通縮及美元升值下，金價將持續下跌。技術上，金價在1,200至1,300美元水平橫行好一段時間了，積存了大量蟹貨，如今確認破位而下，相信有必要來一次較大型的洗倉，先至可以試到邊度係底，用家唔係等用就唔使心急撈貨。

香江魚缸交投持續淡靜，幸得三大中資電訊股撐場，場面先至冇咁冷清，部分游資轉番去炒細價股，好耐冇炒過的生豬養殖股如普甜食品（01699）、惠生國際（01340）分別升21%及19%，建築股興勝創建（00896）及日成控股（03708）亦見人氣，分別升15%及21%。

建築業好睇唔好食

講開又講，近年建築相關股份持續炒高，去年末季以來上市的半新股如日成、震昇工程（02277）及三和建築（03822）都已累積可觀升幅，連老牌企業如俊和（00711）、興勝今年都有大炒過。可以講，呢幾年香港都在努力增建房屋，建築及樓宇維修等需求大，唔憂冇生意做。

之不過，房地產呢個行業，最大舊利潤都係去晒地產發展商個袋，近十年建築商都係艱苦經營。

外人以為接大地產商建造合約好好做，實情呢類大客應收帳唔容易收，一味拖，唔合作好難簽到新合約，反枱的話就招來大批「師爺」專門侍候講合約精神，加上建築業界勞工緊張，成本有加冇減，嗰十幾個巴仙毛利率真係唔易賺，故個別索性轉戰周邊地區如澳門，又或者索性自己做埋發展商，肥水不流別人田。不過，呢浪建築股的估值邁向高峰，唔知會唔會係樓價見頂前一個最後的「高潮」，古勝選擇做旁觀者。

營運數據普遍理想

三大內地電訊股對昨日升市貢獻不少，其中聯通（00762）表現最強，收報11.56元，升5%，貢獻恒指11點升幅；屬巨無霸分量的中移（00941）收報102.2元，升4%，貢獻恒指73點升幅；至於中電信（00728）亦唔輸蝕，升5%收場，報4.66元，貢獻國指12點升幅。板塊集體上升，除了公布六月份經營數據普遍理想，已掌握中績表現的基金們可以安心加注之外，有關鐵塔重組的傳聞亦成為催化劑。

細看數據，聯通六月份移動用戶累計達2.89億戶，按月跌99萬戶；3G及4G用戶累計達1.58億戶，淨增500萬戶，較五月份淨增73萬戶明顯提速，抵銷了整體用戶持續流失的利淡消息之餘，亦令人憧憬。再看中移，六月份淨增86萬戶，較五月份的淨增37萬戶亦明顯加快，六月份移動用戶累計增至8.17億戶，其中六月份4G客戶淨增1,932萬戶至1.9億戶，3G客淨減786萬戶至約2.15億戶。

翻查資料，中移去年底的4G客才9,006萬戶，即係半年時間經已翻咗一番有多，即係話，上半年其新增的4G客數量多過德國全國人口，當真厲害！

鐵塔公司再惹憧憬

至於中電信，六月份3G及4G用戶淨增182萬戶至1.31億戶，較五月份淨增201萬戶增速有所放緩，而總移動用戶按月則淨增76萬戶至1.91億戶，相對其餘兩大對手有點失色，但股價照樣向上，主要是有傳聞指鐵塔公司擬在一七年IPO前，先在今年內進行一次非公開出售最多兩成股權，市場憧憬鐵塔公司工作將啟動之下，中電信一向被視為較大程度受惠於合組鐵塔公司一事，故股價一於跟大隊走高。

事實上，三大電訊商基本因素良好，前景展望屬穩定，預計下月將會完成向鐵塔公司注資，消息流正面，而現價估值亦不算昂貴（一五年度預測EV/EBITDA約4至5倍，較區內同業平均9倍為低）。唔嫌大價，古勝認為中移始終是實力之選；若怕犯本的話，其餘兩隻，傾向選擇中電信先於聯通。

古勝