絲絲講場:離婚可撐樓市?

內地股市難睇?其實樓市都一樣。中國房地產協會副會長任志強早兩日出席房地產論壇,人稱「任大炮」嘅佢又有新睇法。雖然依家房地產增長慢,不過唔使驚,佢話有人離婚就得喇。

任大炮話,每當有人離婚,家庭會分裂,就需要更多嘅住屋。中國離婚率年年升,每年有成二三十萬個家庭離婚,所以住屋好有需求喎。明晒,有網民仲即刻話「愛國就辦離婚」。

大媽起舞 拖冧樓價

學完任大炮嘅講話後,大家再嚟見識多樣嘢,就係上車唔一定靠富爸爸,靠大媽一樣得。話說哈爾濱中北春城小區有個廣場,一班大媽好鍾意喺度跳廣場舞,不過大媽嗰種熱鬧法唔係一般人頂得順。有業主放盤,經紀話單位喺正校園區實搶手,開132萬人仔無問題。點知,一知道日日有大媽跳廣場舞,班睇樓客即閃,就算業主割價到120萬都無人吼。咁搞法,大家仲唔係易啲上車。

余絲韻