絲絲講場：虎哥會雷軍「雞同鴨講」？
小米副總裁巴拉（Hugo Barra）早排話，部部手機都有角位、中間都有個Home Button o架啦。
巴拉咁講，大家何只睇到小米梗冇抄蘋果，仲睇到佢幾咁愛護小米，都未計佢起埋個「虎哥」呢個中文朵嚟投入小米家庭。
不過，佢前年由Google跳槽去小米時都幾爆，究竟點扯得埋？原來就係佢同雷軍初遇嗰四粒鐘，虎哥最近講番，仲話感覺好Surreal喎。超現實？發生咗乜？
讚「Android之父」級數
虎哥自爆，一二年尾佢同雷軍喺北京初見面，傾足四粒鐘，天南地北，由手機到互聯網、又由巴西講到車。虎哥仲即場覺得雷軍係屬於「Android之父」Andy Rubin嘅級數。
咪住！虎哥係英文人，雷軍最耍家英文金句係「Are you Ok」，佢哋咁深入嘅溝通係......係靠小米總裁林斌即場翻譯，仲好似係逐句嚟。
四小時快似十分鐘
減晒啲逐句譯，啲肉可能得番......難怪虎哥話呢四粒鐘過得快似10分鐘。原來拍戲一樣，係「迷失北京」，即係「Lost In Translation」囉。
不過，無論四粒鐘定10分鐘，啲肉剩幾多，都唔重要，賣手機夠時常話新機薄咗幾多mm、CPU快咗幾多倍、四核定八核，絲絲明唔晒都一樣聽住就信，好明顯，虎哥當時嘅Sell功，過到雷軍關有餘。
講到「迷失」，當年全世界都知虎哥喺Google唔開心，事關被老闆布林搶咗佢位港產混血女友，虎哥一直話跳槽唔關感情事喎。不過聽聞布林同位混血美女都分咗手，乜都煙消雲散。至於雷軍，自從早排喺印度Show英文搞到出咗「Are you OK」金句後，就一直耿耿於懷。其實，公司搞得好，吸引到人才；英文，仲使乜自己講喎。
余絲韻