技術分析 做「燭」路高手
近排孖妹一班喺月初小股災前已清倉、或精於做淡嘅股友個個成日四萬咁口，如果月頭識得入市撈貨嗰班簡直如沐春風添！不過，喺中央暴力救市後，有幾多個人係睇得通後市？與其要斷估，不如搵技術分析專家按圖索驥，提升勝算。
大市篇：港股七成機會再跌
郭：駿溢環球金融業務推廣董事 郭樹鈿（Tim Sir）
彩兒：國家隊上星期趁A股期指結算發力掃高股市，但係我哋一班姊妹嘅信心都未回歸。
郭：技術分析就好似「圖表語言」，散戶可以從特定圖表形態估計大市或股份嘅升跌時間同資金流向，每當出現特定模式先做嘢，見招拆招，個人操盤只信圖表指引，唔會信自己，咁反而冇咁易迷失同出錯。
恒指隨時試14800點
郭：我覺得今年從未出現過牛市，港股目前正處於熊市二期反彈，再跌就會轉勢踏入熊市三期，現時都仲有七成機會再跌，跌穿通道底部支持位約23,000點就會下試14,800點。（上周五恒指收報25,415點）
月初恒指出現大成交嘅橫行格局，係經典大戶派貨模式，之後雙頂（M頂）喺通道頂部出現，威力更勁，完全係標準跌市形態，其後洗倉到約23,000點通道底部出現過雙日轉向同V形反彈，有機會係盤底形態，應可反彈到26,100點，如果後市出現溫和下跌或橫行走勢加上細成交，咁就只係獲利回吐盤，唔係沽壓，市況有機會好轉，不妨做小量好倉；一旦升勢轉弱，有機會再下試通道底部，到時就只宜做淡。
孖妹評價
14,800點？你嚇我唔到嘅！
國指未見築底特徵
郭：國指喺突破約15,000點阻力區失敗後，引起投資者「失望的沽售」同出現大成交，其後走勢就反覆向下，及後出現V形反彈，由趨勢線推敲，短線可上望12,500點，遇阻就下試10,250點。由於目前處於造底初期，未見成功築底特徵，即使有投資者掃貨，但成交不大，所以暫時仲睇得淡啲。（上周五國指收報11,850點）
孖妹評價
「失望的沽售」嘅威力同深水炸彈有得揮。
滬綜指出現上升楔形
郭：滬綜指升穿5,000點後就出現上升楔形，用波浪理論睇，進入升浪極尾聲，明顯見頂。再睇輔助指標，RSI強弱指數出現三峰背馳，即一峰比一峰低，屬見頂條件，而MACD進入熊市周期，係強烈沽出訊號，之後大市跌至約3,390點支持區見反彈，下一步上望4,100至4,200點，遇阻便下試2,950至3,200點。（上周五滬綜指收報3,957點）
孖妹評價
A股上得番，中國大媽就唔怕冇錢買餸啦！
股份篇：運用強勢股出擊無有怕
盧：興證（香港）客戶投資組副總裁 盧駿匡
Kitty：目前係資金市，你啲技術分析仲靈唔靈（口架）？
盧：市場反應喺資金市中仍然係重要指標，而圖表就可以反映投資者情緒，分辨消息係正面還是負面居多。我喺四月預料到六月底至七月頭將出現調整，主因四月上旬公布基金互認，刺激恒指急升，當時升勢同九七年及○七年牛市三期（牛三）最後一個調整前嘅走勢相似，縱使歷史未必重演，但歷年來市場反應卻是萬變不離其宗。九七年與○七年的牛市分別在「牛三」大奇迹日後四個月與兩個半月完結，保守計算，恒指牛市仍未完結。
我用市場焦點股騰訊（00700）、港交所（00388）同阿里影業（01060）分析畀你睇啦！
騰訊先沽一半持股
盧：騰訊係恒指成分股，但佢顯著跑贏恒指，喺月初恒指爆發小股災時，遲過大市跌穿250日線，仲冇跟隨恒指出現下跌裂口，意味有資金追貨、投資者惜售，可見佢係比較好嘅入市對象。再者，佢亦早過大市收復至250日線樓上，反映強勢。
公司股價仲未進入橫行區間，值得候低收集，但反覆升至橫行區間頂部將遇顯著阻力，投資者到時可考慮分段獲利，不妨先沽出三分之一至一半持股，剩低嘅長揸，鎖定利潤增強投資心態。
孖妹評價
呢隻企鵝仔都好得我哋歡心！
港交所擁躉低位吸納
盧：港交所都係藍籌股，佢走勢仲好過騰訊，主因佢月初唔單止遲過恒指跌穿250日線，仲冇出現下跌裂口，佢跌穿250日線嘅幅度比騰訊細，意味眾多投資者願意喺低位吸納，而且喺反彈過程中出現大陽燭，暗示有資金流入，供求關係顯著強啲。若其後升至橫行區間，將遇283蚊嘅重要阻力位，投資者到時可分段減持獲利，之後要等到股份突破橫行區間，先有望再創新高。
深港通或於第三季開通，有機會刺激股價向上，但投資者要小心觀察，一旦市場反應負面，就要提早獲利。
大市成交同港交所股價有密切關係，參考過去九七與○七年的「牛三」，港交所喺上述兩個時期股價升幅可高於大市成交升幅接近兩倍，預料今年牛三完結之前，大市成交金額可接近四千億元，以此保守推算，年內股價不排除見400元。
孖妹評價
好想見證港交所衝破400大關啊。
阿里影業出現利淡形態
盧：阿里影業喺急升後出現反覆回落情況，仲一浪低於一浪，出現下降三角形利淡形態，喺下破支持位後仲出現顯著調整。
再者，由250日線觀察，月初恒指大跌時，兩者雙雙喺同一日出現下跌裂口，意味股份同大市同步，而下降三角形嘅底部將成為近日嘅反彈阻力，所以股份一定唔係買入首選啦。
孖妹評價
唔通有趙薇呢粒星都唔夠照？
Kitty & 彩兒
若有料報畀彩兒同Kitty或有嘢問，可電郵money.biz@on.cc