北水頭等倉：上實城開測試支持
一如所料A股在股指期貨結算前再起波瀾，滬綜指險守3,800點，滬市及深市均有逾800家上市公司股價低收，兩市合共有逾600家公司停牌，市場氣氛似乎再次逆轉，是否已完成反彈，跌勢再現，不得不有所防範。總之短期行事須謹慎，自問心血少就學吓「自動停賽」﹗
內地公布上半年經濟數據，GDP同比增長7%，農業生產形勢較佳，工業生產則尚未見有好明顯的復甦迹象。到底數據有冇水份，投資者自有盤算，但若然下半年再有大偏差，則全年經濟增長保七則可能未必能達標。
個股方面，早前中資熱炒的中概股，昨日又再遇上明顯沽壓，如元征科技（02488）一度插落12.9元，收報14.32元，跌10%；幸福控股（00260）跌近一成；航天控股（00031）跌8%。觀乎大市成交降至只有一千億多啲，大風浪過後，交投趨靜概率甚高，短線炒作都係一動不如一靜。
至於中長線價值型投資，其實唔少中概股又回落至一個吸引的估值水平，只是整體市場氣氛唔就，上車要預咗要坐，唔係好吸引難以動身落場。上實城開（00563）股價上周曾低見1.21元，昨收報1.68元，市帳率0.7倍唔夠，真係夏日清貨大平賣！今年首季其股價低位在1.21元，上周大跌市低位在1.27元，季內若再成功下試該水平承接，應該可以再一次確認底部支持。