Market Insight：基金買貨意欲唔大

到底係唔啱經濟愈差博人行愈要放水的炒作旋律，抑或懷疑7%的真偽都好，事實係眼見暴力救市的效果逐漸減退，A股大媽面對復牌潮的不明朗因素，實際啲攞錢走，形成A股一瀉如注。話說回頭，第二季GDP有7%算是爆個半冷。彭博追蹤38個經濟師，得四個估7%或以上（7.2%及7.4%各有一個），主流係估6.8%，有成16個之多，相當於受訪人數四成二。

正常而言，上半年GDP佔全年比重四成五左右，最終一五年能否成功保七？真係要睇埋跌市之後的災情處理得好唔好，但可以肯定，人行繼續開大水喉泵水救經濟，是事在必行。

芬佬寧要錢唔要貨

美銀美林一份報告指出，訪問全球191位基金經理，統計發現其倉位中的現金比例，七月份由4.9%升至5.5%，創下○八年十二月以來最高，亦係○一年十一月以來第二高。芬佬們主要對希臘債務危機的結果有戒心，加上第四季美國啟動加息已是市場共識，以及中國股市股災，嚇驚得令佢哋紛紛要錢唔要貨。

一般而言，基金大約留住4%現金作備用，較低現金值反映入市參與度高，看好市況，反之愈高即避險情緒愈高，4.5%以上算高，去到5.5%並唔常見，反映美國處退市轉角位，整個市場風險胃納較低的情況。

傳統上，高現金比例是看好後市的訊號，但今次對中港股市有冇幫助，古勝都唔敢講咁大聲。皆因今次中國亂石投林，由人行「雙降」、國家隊入市，再叻到後期將沽空分出惡意、善意，兼且出動到公安真刀真槍調查，許升不許跌，已經令一班崇尚自由經濟主意的外資芬佬大開眼界。

近一點可以睇到，單係睇過去八個交易日，無論A股升市跌市都好，滬股通都係沽多買少，相信已多少感受到班外資芬佬，點睇中國股市。報告仲有提到，依家芬佬最睇好銀行及自主消費股（亦即係非必須消費一類）、歐元區及日本股票，睇淡原材料、新興市場股市及能源股，似乎不妨諗諗，睇吓日股及歐股ETF，分散一下風險。

成交縮難企穩千億

港股愈玩愈縮，走勢相當肉酸，尤其以上周三大時代，千四點跌市當日2,359億元成交相比，昨日主板交投縮到得1,046億元，睇怕北水收工之後，唔使幾耐大市成交會返到千億水平樓下。

港股跌過彈過，明顯見大戶在兩萬五點入市之興趣唔大，昨恒指跌65點收報25,055點，上周DEEP V大時代，唔少手上彈藥充裕的外資基金，要撈底又無心水，焗住追住幾隻重磅藍籌。

昨日又再見到類似情況，全日逾1,300隻股份插水，指數卻跌得相當溫和，全因友邦（01299）、中移（00941）、滙控（00005）及長實地產（01113）四隻撐住個市，多少反映個市無乜投資主題，基金買住幾隻高防守藍籌，想減低現金比例，但又唔想冒太多風險的倉底部署。

A股托唔住，券商股首當其衝，中國銀河（06881）昨跌7.4%，廣發証券（01776）跌5%，中信證券（06030）跌4.8%，海通證券（06837）跌3.6%，HTSC（華泰證券）（06886）跌2.1%，看來券商股反彈已暫告一段落。

新丁上水面宜食胡

生產潤喉糖的金嗓子（06896）昨首日掛牌，收報4.87元，比招股價4.6元升0.27元。早前撞正A股股災掛牌，一度深潛的魚缸新丁，部分都有回到水面迹象，好似和美醫療（01509）、天彩控股（03882）及中智藥業（03737），昨日都去過掛牌後新高。

至於在下早前提過，中藥顆粒農本方生產商培力控股（01498），以5.98元招股，首日大平賣插到落3.47元，唔覺唔覺前日最高上返去5.9元，昨收5.55元跌3.3%。近36倍往績市盈率，純貪平撈底的可以考慮食一食胡，現價再升真係要睇業績同大市氣氛。