若有人同你講，個市淨係會升唔會跌，你除咗話佢天真就只能講句「傻的嗎」。估唔到，內地有大學生真係天真過小學雞，無論A股冧成點，仲依然覺得「唔使驚，阿爺喺大廳」。
話說有個23歲嘅杭州大學生，問阿爸阿媽借咗20萬人仔，靜雞雞入市，點知撞正A股冧市。點算好？呢個大學生最初有諗過沽貨離場，不過一見阿爺出招救市，即刻變卦留低，寧願繼續瞞得就瞞，晚晚失眠，係咁蟹住，仲話好有信心點都唔會走喎。
唔止大學生，連專業人士都係咁。上海有間證券行嘅投資顧問，叫啲客唔好止蝕，蝕咗六成都唔好離場，個投資顧問仲信阿爺「只有想不到，沒有做不到」。
中信里昂訪問咗五百幾個有幾年投資經驗嘅內地散戶，三分二人話個市有阿爺撐，過半人話嚟緊三個月A股升硬。
難怪有人話「金魚記憶有7秒，但股民記憶得6秒」，冧市嘅慘況？唔記得嚕。不過，有個喺美國讀緊大學嘅內地生，上個月A股開始跌就放晒手上嘅貨，仲話個市冇邏輯可言，太危險，唔再入市。果然企得遠啲，睇得清啲。