絲絲講場：股市散水新戶潛晒水
港股大時代由四月八號開始，話咁快就玩完，除咗上市公司股價跌到散晒外，好多嘢都打回原形。好似證券行嘅開戶人數，高峰期每日逾百，依家得番十幾個，大跌九成，而市旺時嗰啲「加急開戶」更加潛晒水。所有嘢，就好似發咗場夢一樣。
相比大時代跌剩一成
冇幾耐之前，絲絲仲記得啲證券行負責人「晒命」，話港股開戶人數真係多到離晒譜，一日等於以往十日嘅工作量，仲誇張到話因為前線負責開戶嘅經紀係咁催後勤同事快啲批核文件，搞到兩幫人嗌晒大交！
翻生「殭屍戶」再冬眠
相隔都唔夠三個月，證券行內依家不單唔使再嗌交，直頭悶到要捽手指。事關開戶文件之前平均每日有60份，港股大時代高峰期更過百份，依家？跌到只得十幾份，清閒到呢。
仲有，港股大時代時，特別多客投訴，好似死機、慢機、存錢問題等，因為當時好多年嚟冇晒影又冇交易嘅「殭屍戶」突然復活，加入炒股行列，又要重新Set密碼同存錢，又因太耐冇炒股而唔熟行情，自然投訴多多。依家啲殭屍戶又返晒去冬眠，投訴少晒，證券行得閒咗，真係唔知係開心定唔開心。
余絲韻