Market Insight：醫藥股實力勝一籌

歐元區最終還是就援希達成協議，困局暫得紓緩。債仔明知玩到過咗火位，如今內部水深火熱，唔想去到盡一鋪清袋，就要乖乖硬食還債方案。但到底希臘係咪真心推動長期改革，徹底解決政府收支不平衡的根本問題，仲要放長雙眼睇落去。呢個計時炸彈仍然存在，班歐元區大佬們都冇覺好瞓；但拆走又驚其他債仔有樣學樣，後果難以承擔。為今之計係一日唔反枱，一路都行拖之訣，有日過日！

近年內地自製牛市，且由「快牛」變成「瘋牛」，明顯槓桿失控是底因。除了是券商急速擴大兩融業務之外，場外配資活動快速擴張至失控地步亦為關鍵。繼公安高調介入調查惡意造空活動，中證監劍指場外配資活動。昨日消息指互聯網配資平台集體停止提供配資服務。

打擊外資入場信心

冇咗呢股力量參與，相信未來一段時間，A股交投活躍度將會降低，這肯定會對券商估值構成影響。問題係，如今各方都在響應中央救市，本地券商、有參與內地券商業務的外資大行，統統配合維穩語調，實話少說，一來怕失掉生意，二來又怕被標籤為「惡意」行事的一群。

在呢種非常情況之下，投資者最重要係信自己雙眼，且量力而為，畢竟影響股市的因素千變萬化，市場本身的基本因素是強是弱，冇得話係就係，求神拜佛環球市場短期唔會有咩風浪，否則上大人未必每次行事都能稱心如意。

逾300隻A股同時復牌，也許事前已做好「保底」工作，唔少都可以避過一跌，滬綜指更一度重上4,000點。開出呢個局，大概市場不會再過度擔憂停牌公司復牌潮會否引發A股震盪再現。之不過，古勝相信呢次大規模停牌潮經已嚇怕老外，毫無疑問會對獲納入MSCI的計劃造成新的障礙。應對之法不外乎是以時間淡化，以行動重建信心。認同呢個說法，當能接受A股必要整固一段時間，始可再有大作為。

重新聚焦國策題材

全方位救市之下，就連經濟數據表現都能令人感到慶幸。海關總署公布六月份內地進出口數據，以美元計，六月出口同比增長2.8%，勝於市場預期的1%；進口同比下跌6.1%，亦較市場預期的跌幅15.5%為佳；其中對美國出口同比增速由五月的7.8%提升至六月份的12%，而對歐盟的出口同比跌幅亦由8.1%收窄至6%，整體表現勝預期。

不過，本月的希臘事件或多或少會令對歐盟出口受影響，對美國出口則尚要過九月份聯儲局會議的一關，加上經歷本月A股大震盪，本季內部需求勢必打折，綜觀內部及外部形勢，較大的期望只能放在第四季。

今年以來，相對於國企改革、軍工、新能源、「一帶一路」、互聯網金融及互聯網汽車等題材，醫療改革概念的炒作較遜色，但亦正因如此，這個板塊受今次大跌市拖累的震盪相對細，若下半年企業業績能傳來佳音，在下相信板塊表現有條件後來居上。

近月有多家醫藥相關新股上市，板塊氣氛本應熱鬧，偏偏不幸遇上大跌市，令開局失色。就如環球醫療（02666）、培力控股（01498）及和美醫療（01509），首日掛牌均潛水，現時雖較低位反彈，但仍未重上水面。至於昨日首掛的中智藥業（03737），亦曾較招股價2.46元低2.8%，收報2.39元。

首選大市值實力股

對於並未有持貨的投資者而言，新股開低走低不一定是壞事，最重要是公司業務有錢景，一般而言只要收一浸貨，市況配合的話，後市唔難炒番上水面，愛探險者可以留意下呢類新股的表現。

當然，只想安安穩穩作中長線投資，大市值實力股仍是首選，就如國企背景的國藥（01099），以及一直持有國藥股份並進行戰略合作的民企復星醫藥（02196）。復藥派發末期息每股0.28元人仔，將於八月三日除淨，短線反彈至27元料有阻力，不妨等等，睇有冇機會在25元樓下加注順便收息。

古勝