Market Insight：汽車股買盤積極

昨日滬綜指早晨之星都出埋，諗住無死，但要小心可能只係一廂情願。滬股通旺得兩日咁大把，昨又再呈現沽凹情況，淨流出31億元人仔，可見外資基金對今浪A股不過抱住有食就食的短炒心態。昨日中國結算最新數據，上周（六月十五至十九日）A股新開戶見高峰回落，得99萬戶，比前周勁跌三成。

自中車合併後的第一跳，確實是一個轉捩點。大媽爭崩頭開戶熱情漸見不再，上周參與交易的A股投資者，亦按周跌至3,479萬戶。基於兩融短期見頂，A股頗依賴新增開戶提供新資金支撐，惟數據所見，對A股後市並非吉兆也。

A股短期調整或未完

特別是，已經有一排無見人行進行逆回購放水，銀行又面臨半年結要做靚盤數，內地頭寸漸緊。睇番一個月期人民幣同業市場，由三月近5厘碌到落五月底的2.26厘，近日已輾轉返到去3.45厘，由低位回升近五成二之多。過去大半年的A股升浪，實質經濟復甦因素欠奉，反而睇住流動性盛衰去做，以此推斷，短期調整可能仲未完，不妨睇埋半年結後再算未遲。

港股昨升71點收27,404點，主板成交又縮返去1,170億元，比周二少近190億元。較有氣勢的藍籌有三桶油及股王騰訊（00700），後者抽升3.5%收163.7元，一隻股票已貢獻93點，撐升成個恒指。

阿里影業（01060）宣布與美國派拉蒙合作，進軍荷里活第一炮，投資《職業特工隊：叛逆帝國》，亦即係靚佬湯職業特工隊系列第五部作品，查實套戲已經拍好，預告早排亦都上咗網，七月會全球公映。阿里影業表示主力為該電影的票務、衍生商品及推廣上合作。

富智康藉盈喜發力

近年荷里活愈來愈睇重中國市場，去年《變形金剛4：殲滅世紀》大量內地企業贊助，觀眾唔知仲以為係合拍片。早排《狂野時速》第七集，唔單止盡破中國票房歷史紀錄，狂收3.9萬美金，居然仲勁過美國本土3.5億票房收入。美國電影公司見到點會唔流晒口水，搵機會泊大碼頭，一來搵更多企業掟錢落去做植入式廣告方便啲，其次亦希望上畫之初，盡量搶多院線屏幕全力吸金。

可惜阿里影業今次的合作細節，例如拆帳形式未見詳情，恕古勝都唔識點分析，到底市值835億元的阿里影業，依家係值定唔值。

收市後，富智康（02038）發盈喜，預期六月底止半年綜合溢利淨額，介乎1.2億至1.35億美元，對比去年同期4,983萬美元大升1.4至1.7倍，對比去年全年賺1.69億美元，今年業績報復式反彈幾乎可以肯定。按半年營收，一五年度頗大機會超越大行估計的2.2億至2.3億美元盈利，加埋短期印度建廠消息確認，4.3至4.6元上落區整固之後，應該唔使幾耐可見5元樓上。

四月大時代之後，久沉的汽車股有迹象吸引番睇基本因素的芬佬興趣。跌得最傷的華晨汽車（01114）連抽兩日，昨日隻吉利汽車（00175）走勢悅目，升2.2%收4.17元。

大行睇好新車銷情

早排瑞信出報告，話睇過吉汽準備年底推出的新車款NL-3設計後，印象深刻，調高對該款車推出後的銷售預期。昨輪到美銀美林唱好，話GC9車款有機會帶動吉利SUV車系進入熱賣周期，全年銷售目標有機會由原來45萬輛調高到49.8萬輛。

查實睇番五月的銷售數字，單月銷量升25%去到3.84萬輛，帶動首五個月銷量去到21.9萬輛，按年升幅40%，已經相當於全年銷量目標45萬輛的49%。半年數據出埋，下半年又有新款應市，調高一五年銷售目標相信是遲早問題。

過去兩日，已見春江鴨偷步力吸吉汽之手影，兩日升近7.7%，仲要成交對辦，以美銀一五及一六年每股盈利預測0.351元及0.497元人民幣，今明兩年市盈率只有9.5倍及6.7倍，以一六年超過四成的每股盈利增幅，目前股價幾抵博。

古勝