有傳英國靚仔名廚杰米奧利弗（Jamie Oliver）搵咗加拿大皇家銀行幫手，準備出售名下飲食集團嘅部分股權，買家可能係英國私募基金3i。Oliver成個集團估值2億英鎊（約23.6億港元），佢點解想賣仔？
睇淡盤生意？No啦。佢其實係想趁市好套現，嚟開多幾間餐廳。現時佢嘅飲食王國除咗遍布16個國家或地區、每年營業額成1億英鎊嘅Jamie's Italian意大利餐廳之外，仲喺倫敦經營傳統英倫料理Union Jack同埋Barbecoa扒房。
佢仲打算增加Jamie's Italian喺香港、澳洲同印尼嘅分店，同再喺倫敦開多間Barbecoa添。
有傳佢仲打算減持出版業務嘅股份。冇錯，佢連出版生意都有，佢嘅飲食、媒體同零售生意，養緊差唔多8,000人！
余絲韻