絲絲講場：四叔又快抱孫 預告派萬元利是
恒地（00012）主席、人稱「四叔」嘅李兆基出名慷慨，愛慈善外，逢家有喜事，都樂於集團上下齊齊慶賀。佢位千億新抱徐子淇再度有喜，四叔尋日預告會向員工派大利是，至少一萬蚊封！
徐子淇再度有喜
徐子淇06年同恒地二公子李家誠結婚後，密密佗B，已為李家添咗兩個囡囡一個囝囝，加埋恒地大公子李家傑嘅三胞胎，「四叔」抱孫心願幾咁圓滿。四叔向員工派利是從不手軟，多次開心抱孫，都豪使過千萬元向集團員工大派利是。
尋日四叔仲親自預告「喜訊」，新抱徐子淇再度佗B，四叔講到明繼續皆大歡喜向旗下員工大派利是，仲講明多過上次，至少一萬蚊。四叔身邊唔少員工不知幾開心，即時多謝四叔。
余絲韻