絲絲講場：喬布斯舊拍檔3F尋開心
蘋果公司創辦人阿Steve尋日嚟咗香港出席論壇，唔使驚，未到七月十四，亦唔係愚人節，呢個Steve唔係已故教主喬布斯（Steve Jobs），而係另一個Steve，即是沃茲尼亞克（Steve Wozniak）。佢話快樂Formula有三個「F」：食物（Food）、玩樂（Fun）同朋友（Friends）。咦，科技喺佢嘅快樂入面，原來無定企。
爆教主一心做領袖
Wozniak又話，懷疑呢條快樂方程式仲有第四個「F」。唔明？自己諗。講番Wozniak，佢話自己好簡單，唔使長命，只要開心。不過一講到以前，佢就話舊拍檔喬布斯真係唔簡單。咦，有故仔，唔多似開心個隻喎。
佢話同喬布斯唔係一拍即合，話喬布斯心入面唔係咁鍾意佢。佢仲話，蘋果公司上市之後，喬布斯成個人變晒，想成為領袖；但佢自己就只係想做電腦工程師，唔鍾意辦公室政治，唔鍾意炒人，淨想喺實驗室創造多啲新嘢。於是喬布斯主外，佢就專注研發，結果好少人識佢。
澄清套戲劇情有錯
佢尋日仲澄清，話當年係佢帶喬布斯去個電腦業餘愛好者俱樂部，啲戲講話係喬布斯帶佢去，係錯嘅。
睇嚟快樂方程式入面，佢Friend呢Part似乎就……問到佢科技究竟拉近人嘅距離？定令人更疏離？佢話，就算太太瞓喺旁邊，都會Msg太太，理由係「覺得方便啲」喎。
話時話，尋日唔見Wozniak戴Apple Watch嘅？絲絲明明記得，Wozniak雖唔再係蘋果主腦，但仲係果粉。
一一年出iPhone 4S同埋一二年出新iPad嗰陣，佢都畀人影到排頭位買新機。擺明係超級果粉，今次唔撐Apple Watch？
唔識網訂Apple Watch
佢話，現任蘋果教主庫克（Tim Cook）有畀過員工優惠佢半價買Apple Watch，不過自己唔識點訂喎，理由係個內聯網系統太複雜。吓？
佢又話自己買過蘋果對手三星嘅智能手錶，但覺得既已有部電話，做乜仲要隻似電話嘅錶。佢又話Apple Watch依家所謂有廿幾款，其實只係唔同色嘅錶帶，話公司個Style同以前唔同晒。咁即係？之後佢又話，自己隻Apple Watch訂緊，返到美國就應該收到咁講。咁講，補飛？
余絲韻