絲絲講場：擸中移電話卡筍過收息？
中移（00941）尋日股東會（AGM）嘅紀念品，係面值80蚊嘅手機電話卡，出席小股東無論揸幾多手股份，都係按人頭一人可以攞一張電話卡。有小股東嫌西餅都無件，又有小股東嫌一張電話卡少，提議中移董事長奚國華每人派多幾張，既照顧埋小股東家人需要，仲可以吸多啲客咁話。
若然只係少少哋揸得一手中移，又想掃多幾張電話卡留念？其實辦法又唔係冇，若你唔嫌煩的話。
一手盡攞 多26倍股息
理論上，以香港為註冊地嘅公司（中移肯定係），小股東有權按所持股數，去委任等額代表出席公司股東會。換言之，一手中移（即是得500股）可以搞出500個人頭去股東會，照計可以攞到500張電話卡。以尋日收市價103.3元計，中移一手入場費約5.16萬元，即賺4萬蚊面值電話卡。
咁咪和味過派息足足26倍？嗱，絲絲先旨聲明，係純理論兼且係假設，仲未計行政成本，兼仲要係揸實物股票嘅股東先得。實際上又行唔行得通？唔知o架，若有高人有睇法，又不妨指點吓分享吓，等絲絲學吓嘢。
又幫中移計吓，以尋日到場近100名股東計算，派電話卡帳面成本都只係約8,000元。不過，若以出席投票計，獨立持股有成35億股，若一股一人頭，中移派呢張80蚊電話卡就要用2,800億元，即係用盡晒去年全年盈利1,093億人民幣，都未夠畀電話卡錢。誇張咋？係咩？
絲絲再鄭重咁用9秒9讀多次免責聲明，以上純屬假設性，日後發展如有雷同，實屬不幸。
余絲韻