Market Insight：逆市靠穩股要睇實

兩融額度企穩2萬億元人仔掂住天花板，加埋未來兩星期大量新股凍資及人行突然正回購，擺出短期收水態度，火箭一樣的A股終於受地心吸力影響，滬綜指破五千點關口不成，倒過來大插6.5%收報4,620點。不過，現價計滬綜指年初至今累積有42.8%升幅，內地創業板更升133%是全球之冠，總算有咁耐風流先嚟折墮。

不過，在四月九日講話放行公募基金南下入市，港股興奮一陣後，橫行超過個半月的港股就無咁好彩。昨日跌626點，收報27,454點，內銀股成分較高所拖累，國指跌幅更大，跌518點報14,183點，全日近1,300隻股票向下，跌勢全面。而同日先後有186隻股票創過52周高位，相對僅4隻新低股，果然應驗了「上帝要你亡，必先要你瘋狂」，當人人前仆後繼炒股仔炒到不亦樂乎，震倉潮就殺到埋身。

盈富掃上堪稱奇景

着中港股市的熱錢與炒股文化進一步「融合」，神經盤真係愈來愈多。盈富基金（02800）臨收市兩分鐘，由27.9元掃到上28.5元倒升收，在大跌市下，堪稱奇景。係春江鴨叻到未卜先知，預見今日股市反彈掃盈富？

睇落又唔似，單係四點後，最後十五分鐘的六月期指交易時段，低水幅度仲曾經擴大，扣埋六月除息因素，最後都要輕微低水收，畀貴六、七毫子溢價衝盈富都唔曉買期指，可見神經盤唔似專業炒家，更似要收市前買齊而唔多理價的大媽盤所為。

融創中國（01918）終止收購佳兆業（01638），前者股價跌5.7%，昨日小型股災之中，內房板塊好難幸免，融創被插，經已分唔清是股東們唔滿意買唔到佳兆業，抑或跟大勢被沽埋一份。不過，昨日綠地香港（00337）罕有在內地發展商股價一片紅之下，逆市不跌，仲拗腰升1%收報7.86元。

睇番前一個星期，公司批股集資16.8億元搞互聯網金融，街外已經傳話要貨基金一股難求，近幾日分析員會議，綠城高管鴻圖大志，講到三年內新的互聯金融平台，可以達到千億人仔交易規模目標。

綠地香港故事吸引

睇嚟吸引到唔少機構投資者，昨日花旗出報告睇到11.1元，難怪批股之後股價異常硬淨，掂都無掂過批股價7.46元，企住批股價樓上，短期都要睇實。

跌市中唔肯跌的股份，特別吸引在下，尤其資源股呢排唔啱炒鬼胃口，中信資源（01205）早兩日發盈警後唔跌，原因係國際油價疲弱拖累，但五月股價反而由1.4元起步炒到2元。上個月，集團話等緊印尼油氣田Lofin-2勘探報告，揸住油氣田2.5%權益的Lion Enegry卻搶閘披露勘探結果，指探明油氣層厚度介乎1,106至1,300米，每日產量17.8mmcfpd（1,780萬平方英尺）。翻查資料，油井係中信資源在○六年以7.6億元收購印尼Seram項目，包括Lofin-2油氣井一併買回來。油氣田價值，同勘探技術及難度掛鈎，這方面古勝同看官們一樣係門外漢，相信油田價值，更重要係井內潛在蘊藏量有幾多。

中信資源或掘到寶

故此，嘗試在網上找找中海油（00883）近年的油氣井勘深重大發現的個案，在今年三月，在凌水17-2大型氣田，探得油氣層厚度55米，已被譽為中國海域深水勘探的重大油氣發現。去年十月加蓬海崖探明一幅200米厚的氣層，也被視為中海油一大發現。對比下，印尼Lofin-2的探得的井厚度，足足比中海油的「重大發現」仲要厚五至六倍，對比中信資源155億元市值，大約係中海油2.8%，會唔會真係細佬掘到寶，睇番五月開始的異常強勢，看來機會真係唔細。

賺一成四

司慕渢昨日推介中國玻璃（03300），股價以大陽燭創下近三年高位1.8元，實現三連升，以高低位計飆近14%！

古勝