Market Insight：大笨象炒作主題多

近期，中國公布的連串經濟數據，一次又一次叫分析員跌眼鏡，尤其進出口數據，出口仲未止跌唔在講，上月進口按年大跌16.1%，差不多係大行預期跌幅的一倍。不過，今日股市大媽愈見內地經濟疲弱，佢哋就愈高興，博人行繼續放大條水喉，睇上周一個月人仔拆息落到去3.21厘，與去年十二月6.13厘高位比較，跌咗近半，中國再減息只係遲早。

內銀股未受惠減息

周日中午，微信上廣傳人行減息半厘消息，最終證實誤傳。到傍晚時分，人行確認減息四分一厘，周日魚缸客心情恐怕畀佢搞到七上八落，相信幫到大市今日早段再下一城，升多一浸。不過，要留意人行今次又再將存款息的波動區間擴闊，內地銀行不同步減存貸息留住存款的可能性好大，息差壓力的陰影底下，今日要博似乎都唔輪到內銀股。

古勝冇點你

升兩成一

美國掛牌的阿里巴巴首季業績好過預期，上周遭多間大行唱好，留意到績後撰寫的報告，最牛係瑞銀，睇115美元，較保守的瑞穗都改口喊買睇100美元，對比上周四抽升後收市價86美元，水位唔算多。

然而，所謂愛屋及烏同埋並非人人鍾意隔山買牛，香港兩隻阿里系股份突然轉強，阿里健康（00241）周五升11%收報11.68元，阿里影業（01060）升3.7%報3.29元，睇嚟逐浪者怕趙薇會再出貨，追「健康」捨「影業」。

恩達係大時代玩法

本文講過，古勝曾四圍問科網股分析員，無一個夠膽話自己識為兩隻股票做一個合理估值，惟有還原基本步，用番炒賣角度去睇。自阿里健康同天貓買網上藥品平台，大爆升以來，股價在10至14.32元之間上落，走去篤篤機，期間累積加權平均成交價約11.9元，暫可視為高追者平均蟹價，升穿炒多浸出奇，但假如本周頂到行又返轉頭，唔好太大期望喇。

但講到癲，又點夠去年底先上市的半新股恩達集團（01480）咁癲，上市價1.23元，上周初股價企10元樓下，經已聽到身邊口痕友話佢係咪唔做印刷線路版生意，走去印銀紙。點知上周三開始連環乾升，周五見過102元，再插番落去17.44元收市，對於一間去年賺4,400萬元的公司，點可以出現422億元市值（最高位計），莫非股民睇得太多《大時代》，方展博上咗身！

最離奇見佢插到落60元開始，唔少散仔走出嚟搏命。在下唔會阻人發達，但與其要賭不如過澳門，至少輸咗都有免費船飛同酒店歎吓，咁賭法為乜。

暴動股講住咁多先。英國大選塵埃落定，保守黨爆冷一口氣取下過半議席，英鎊即刻上番1.55樓上，英股收復7,000點關口。保守黨執掌對英國經濟是否比較有利，暫時唔敢寫包單，但至少消除到一直預期英國大選後無黨派可以攞到過半數議席，籌組聯合政府的不明朗局面，在下認為短期勢必給予機會藉遷冊消息炒過一浸的滙控（00005）再次做好。

好多人都唔信滙控放得下身段，出售英國零售銀行到香港遷冊，但睇番近幾年，大笨象被美、英、歐盟盯到實，成日搵藉口罰錢，扮吓遷冊擺姿態絕不為過。

不可抹殺分拆機會

況且英國銀行監管機構，逼得幾間有跨國性業務銀行相當緊，要將本地與海外業務分融，免得再嚟一次金融海嘯搞到一鑊泡要政府出錢解困。古勝相信滙控將英國業務沽售機會唔大，但分拆減持的可能性不可抹殺。

睇遷冊消息一出的反應，估計未來一年半載，與英國監管機構隔空發功鬥法，對股價係好處多於壞處。早前股價急抽，股價上周中返到74.05元，幾乎補番73.95至76元上升裂口位後，上周五已見開車迹象，睇樣今次真係有機會成為新一輪升市領頭象。

古勝