絲絲講場：憂A股爆鑊 老外點錯「相」
內地A股爆升，全民皆股，近排不時見到啲大媽帶埋袋餸、湊住個仔炒股嘅相。最近著名外國財經博客網站Zero Hedge，亦轉載咗張中國大叔街頭邊賣蕉邊用電腦（目及）實個市嘅相，仲係一個禮拜轉載咗兩次，唔少外國網友爭住留言，話連賣蕉嘅都炒股，中國A股玩完喇乜乜乜，仲同一九二九年華爾街股災前夕相提並論，話嗰陣一樣連揸升降機同擦鞋嘅都入市。
賣蕉大叔舊圖當新
絲絲睇真，呢張賣蕉炒股相其實喺一三年年尾網上已經出現過，噢，舊圖當新料。咁嗰陣個市有冇冧？睇番一三年，A股喺之前已經「熊出沒」咗6年，嗰年滬綜指喺2,000至2,200點之間上上落落，雖然年中曾經一度跌穿2,000點，但好快又升番上去。去到一四年中，個市就開始爆升，仲「過3爆4」，尋日滬綜指最新收報4,441點。哈，說好的冧市呢？
大行睇A股好淡兩極
乜咁關心A股會冧？啲外國網友係剝緊花生？定食緊粒酸葡萄呢可。摩根大通就話，因為A股隻牛「太瘋」，令外國投資者擔心，所以對A股「無乜胃口」喎。
不過，絲絲見唔少投行分析師都睇好中國股市，仲話只係有啲外國投資者對中國上市企業無深入了解，又連專業啲嘅中文翻譯都冇。
所以呢，咪見到人哋賣蕉都炒股就覺得個市冧硬，分分鐘呢位大叔已經發咗達，其他人仲喺個Blog面前發緊夢咋！
余絲韻