經營時裝潮牌「D-mop」、「Y-3」嘅永嘉集團（03322），佢哋位CFO王志強雖然係地道港人，但就喺北京生活咗八年，佢話南北嘅Taste同購物習慣，真係好唔同。
點唔同法？首先係內地真係好興網購，仲愈來愈Hit。王志強嘅親身體驗，佢試過喺內地陪朋友Shopping，行入舖頭，睇中試完，佢位朋友都唔當場買，點都要行出舖後再上網買！點解？網購平啲？非也。理由竟然係因為怕拎！事關內地大城市常時塞車，交通唔方便，拎住一袋二袋搭車好辛苦，幫襯網購就有人自動送貨上門，慳水慳力。
佢公司賣開潮牌衫，佢又點睇南北品味？佢話，港人相對低調啲，內地Style就高調啲，比較鍾意Logo大番啲啲同埋奢侈啲嘅名牌；不過佢話，近年內地中產亦開始吹起一股叫做「輕奢侈」嘅風。「輕奢侈」？聽講意思係嗰啲較着重原創設計，又較為小眾啲啲嘅中高檔貨，總之唔係通街會撞衫撞鞋撞袋嗰啲，絲絲Like喎。
余絲韻