絲絲講場：小股東插爆滙控高層
「大笨象」滙控（00005）近期麻煩不斷，一班小股東怨氣沖天。滙控尋日喺香港舉行非正式股東會，主席范智廉同CEO歐智華雙雙出嚟受靶，陰功豬。
女忠粉挺身撐No.1
有小股東好唔Like集團年年喺倫敦開正式股東會，但喺香港就只係開「非正式股東會」，小股東質問話，係唔係唔想香港股東投票？怕小股東投反對票令管理層無法續任？佢哋又指責管理層經營無方，搞到滙控多年嚟不斷畀罰款同賠錢，仲話台上管理層應該全部引咎辭職。講到呢度，台下拍爛手掌。絲絲都係嗰句，陰功豬。
又有小股東好嬲，話管理層見親香港股東，講嘅嘢年年都差唔多，話佢哋「講就天下無敵」，實際上業務無起色。呢位小股東甚至懷疑管理層自己將錢存喺第二啲銀行添！聽到咁，范智廉立即反駁，話自己由加入集團以來，一直都係用滙豐戶口出糧，一啲都無對集團失過信心。
好彩，滙控亦有忠粉撐場。有位女士舉手發言，佢替滙控感到「委屈」，勁讚滙豐係「世界NO.1嘅銀行」，先至會惹嚟「妒嫉」同「冤枉」。范智廉一聽到，立即多謝呢位女忠粉，不過剛多謝完就即克慨嘆呢個星期五嘅倫敦正式股東會，應該就聽唔到咁樣嘅讚揚喇......
黑開有條路 官網變「鹹」
黑開有條路？連滙豐個官網都唔生性，尋日有人喺香港官網發現滙豐青年企業家獎個網站（www.asiayea.com），網址click入去竟變咗鹹網，內容絕對18禁，明明講緊一班青年企業家就變咗啲「少婦」同「人妻」！
滙豐都算叫做快手喇，七點幾就已經剷走咗條Link，佢哋仲立即向公眾道歉。
絲絲收到風，滙豐網站好安全，絕對唔係畀人Hack，聽講個網址之前真係正經過正經，只不過無再Subscribe落去，有其他人用，於是就搞成咁......
余絲韻