絲絲講場：伯南克新書被寸無勇氣
論歷任嘅聯儲局主席，伯南克都算「好彩」，任內撞正百年一遇嘅金融海嘯，雖然佢舊年已經卸任，美國經濟亦逐步復甦，但佢當年嘅應對方法仍備受爭議。嚟緊十月，佢會出本回憶錄，親自揭開金融危機時種種經歷同內幕。
內容爆唔爆？未知。不過，書名似乎有啲爆，事關本書叫《The Courage to Act》。咁有勇氣嘅書名，當然立即畀網民惡搞。未睇到個爆位？嗱，網民有話兒。
一場Talk袋廿萬美金
網民話，聯儲局如果真正係有勇氣嘅，就應該畀花旗破產；又有網民話，伯南克所謂嘅勇氣，應該係不道德嘅勇氣，因為係咁，當局先會動用龐大公帑去打救嗰啲經濟衰退嘅罪魁禍首。
伯南克即撲出嚟解畫，話個書名係反映決策者點鼓起道德勇氣，喺痛苦嘅環境同非議聲中採取必要行動咁話。
點都好啦，前朝格林斯潘之前出版回憶錄即袋800萬美元，相信伯南克呢筆亦唔會少。據絲絲所知，伯南克卸任後出席啲演說同公開活動，每場都袋走20萬美元！唔怪得佢先前忽然開Blog，今次書未出，淨係書名都咁有Noise，果然有啲計。
余絲韻